Ахцегьрин Къузай патан са куьче старший лейтенант, Жуьрэтлувиляй ордендин сагьиб, Донбассдин чилел уьлкведин азадвални аслу туширвал патал вичин жегьил чан къурбанд авур кьегьал офицер Тамерлан Ильясован тIварунихъ яна.
Идаз талукь мярекатда игит аскердин диде-бубади, мукьва-кьилийри, гьукумдин органрин, жемиятдин тешкилатрин векилри иштиракна. Мярекатдин тамадавал авур Сулейман Сулейманова Тамерланан куьруь ва баркаллу уьмуьрдикай маналу ихтилат авуна. «Ахцегь район» муниципалитетдин кьил Абдул-Керим Палчаева лагьана:
— Гьуьрметлу юлдашар, къе чна игит хва Тамерлан Ильясован гьуьрметдай, адан тIвар эбеди авун яз, инал махсус кьул ачухзава. Куьчени тамамдаказ ремонтнава. СВО-да хайи Ватан, чи ислягьвал хуьнин пак буржи намуслудаказ тамамарай уьтквем хцин къамат чи рикIера гьамишалугъ яз амукьда. Адан чешнедалди чна акьалтзавай несилар тербияламишда.
Мярекатдал гьакI игитдин эме Мария Ильясова, Ахцегьрин 2-нумрадин школадин урус чIаланни литературадин муаллим Раида Шерифалиева, РВК-дин комиссар Рафик Мегьамедов ва масабур рахана.
Рахайбуру къейд авурвал, Тамерлан Ильясован тIварунихъ куьче ягъун лишанлу кар я: чаз чи игитар чир хьун, абуруз гьуьрметун лазим я. Тамерлан чи рикIел отличник, хъсан спортсмен ва общественник хьиз алама. Женгинин офицер язни, ада вич халис дагъвидиз хас тирвал къалурна.
Ученикар тир Азиза Насировади, Эмина Алиевади, Камила Саидовади, шаирар тир Севинжи Муртузалиевади, Жамиля Саидовади, Луиза Таировади Тамерланаз бахшнавай шиирар кIелна.
Мемориалдин кьул Абдул-Керим Палчаевани Тамерланан буба Нариман Ильясова ачухна. Абуру ва митингдин иштиракчийри анал, гьуьрметдин лишан яз, цуьквер эцигна.
Игитриз баркалла! Рагьметлу Тамерлан Ильясован экуь къамат чи рикIера гьамишалугъ яз амукьда.
Дашдемир Шерифалиев
