Дагъустандин хуьруьн майишатдин товарар гьасилдайбуру 2022-йисан 4 вацра чпиз герек 118 техника маса къачуна. Алатай йисан и вахтунив гекъигайла, им 31 процентдин гзаф я, хабар гузва региондин хуьруьн майишатдинни суьрсетдин министерстводин пресс-къуллугъди.
Къейдзава хьи, аграрийри техникадин 60 процент кьезил лизингдин шартIарал асаслу хьана, амай пайни абуру чпин такьатрихъ маса къачуда. “Асул гьисабдай республикада хуьруьн майишатдин виниз тир еридин техника маса къачуда: “Кировец” тракторар, техил кIватIдай виниз тир еридин “ТОРУМ” ва “ACROS” комбайнияр, санай масаниз тухуз жедай техил кьурурдай машинар, скреперар”. Министерстводин векилдин гафаралди, алай йисуз 700 миллион манатдин къимет авай хуьруьн майишатдин техника маса къачуда. КьетIен фикир республикадин АПК-дин субъектри кьезил лизингдин механизм ишлемишуниз гуда.
«Лезги газет»
