2022-йисуз Дагъустандин хсусиятдиз виликдай къанунар
чIурна маса гайи 1,4 агъзур гадив агакьна чилин мулкар хканва
Дагъустандин Гьукуматдин Председатель Абдулмуслим Абдулмуслимова республикадин жуьреба-жуьре министерствойринни ведомствойрин коллективрихъ галаз гуьруьшар кьиле тухун давамарзава. ИкI, 24-январдиз ам РД-дин эменнидин ва чилерин алакъайрин рекьяй министерстводиз мугьман хьана.
“Лезги газетдиз” РД-дин Гьукуматдин пресс-къуллугъди хабар гайивал, премьер-министрди, санлай къачурла, министерстводи кьиле тухванвай кIвалахдилай вичин разивал къалурна. Ада къейд авурвал, министерстводи алатай йисуз чилер кирида вугунин жигьетдай кутIуннавай икьрарар вири къанунрихъ галаз кьадайвал къайдадиз хкуниз кьетIен фикир ганва. Шаз республикадин хсусиятдиз виликдай къанунсуздаказ маса гайи 1,4 агъзур га чилин мулкар хкана. Республика яшайишдинни экономикадин рекьяй вилик тухунин макьсадралди алатай йисуз саки 2 агъзур гектардив агакьна чилин мулкар инвестицийрин проектар кьилиз акъудуниз чара авуна.
А.Абдулмуслимова министерстводин пешекарри ЕГРН-диз яшайишдин жуьреба-жуьре хилерин объектриз талукь делилар ягъунин жигьетдай кьиле тухванвай кIвалахдизни виниз тир къимет гана. “10 агъзурдав агакьна объектар гьисабдиз къачунва, 360-дан гьакъиндай хсусиятдин ихтиярар регистрация авуна. Газдин ва электричестводин хилера иеси авачир объектарни регистрация авунин кIвалах давам жезва. И кардихъ республикадин агьалияр хъсан еридин энергиядалди таъминарунин жигьетдай еке метлеб ава.
Эхиримжи йисара сифте яз министерстводи налогринбур тушир къазанжияр кIватIунин план тамамдиз ацIурнава. Им, гьакъикъатдани, агалкьун я. Тайин макьсадар аваз, менфятлудаказ кIвалах тешкилунай за министрдиз ва вири коллективдиз сагърай лугьузва”, — лагьана премьер-министрди.
Гуьруьшдин эхирдай Гьукуматдин Председателди министерстводин тафаватлу хьайи са жерге къуллугъчийрив гьуьрметдин грамотаяр вахкана.
Агьмед Магьмудов
