И йикъара синтетикадин наркотикар арадал гъунай шак физвай Дагъустандин медицинадин вуздин кьве студент кьуна. ФСБ-дин республикадин управленидин пресс-къуллугъди хабар гузвайвал, абуруз талукь яз уголовный дело къарагъарнава.
“РФ-дин ФСБ-дин РД-дин управленидин къуллугъчийри тади серенжем кьиле тухудай вахтунда синтетикадин наркотикар арадал гъидай лаборатория кардик кутунвай тешкиллу тахсиркарвилин кIеретIдин кIвалахдин вилик пад кьуна. Виликамаз малум хьанвай делилралди, и карда иштиракнавайбур химиядин синтездин хиляй чирвилер авай Дагъустандин гьукуматдин медицинадин университетдин кьве студент я”, — лагьанва малуматда.
Лабораторияда тахсир субутдай затIарихъ къекъуьнин серенжем тухудайла, анай кардик кутуниз гьазурнавай мефедрон, прекурсор ва маса затIар, тадаракар жагъана.
«Лезги газет»
