Сириядин лагеррай 13 аял Дагъустандиз хкана ва мукьва-кьилийрив вахкана. Идакай Дагъустанда аялрин ихтияррин рекьяй векил Марина Ежовади “ТАСС” чешмедиз ихтилатна.
Къейд авурвал, аялар 2 йисалай 17 йисал кьван яшара авайбур я. РФ-дин оборонадин министерстводин самолетда аваз 3-июлдизни Сириядай Россиядиз 23 аял хканай.
“Къанунда тайинарнавайвал, Дагъустандиз хкай вири аялар абурун къаюмвалдай багърийрив вахкана. Сифте абур Москвада медицинадин рекьяй тамамвилелди ахтармишна. Санлай къачурла, абур вири сагъ-саламат я”, — лагьана М.Ежовади.
Ада алава хъувурвал, республикада аялриз талукь тир куьмекар гуда. ИкI, гьар са аял психологдин, социальный педагогдин, духтурдин ва къайдаяр хуьдай органрин векилдин гуьзчивилик жеда.
Иракдинни Сириядин мулкара авай тамам яшдихъ агакь тавунвай ватандашар алай чкаяр тайинарунин ва абур ватандиз хкунин кIвалах Россияда 2017-йисалай Президент В.Путинан тапшуругъдалди кьилиз акъудзава. КIвалах тартибда гьатайдалай инихъ Иракдайни Сириядай 341 аял ватандиз хкана.
«Лезги газет»
