Дагъустанда къанунсузвилериз рехъ гайи дуьшуьшар, лутувилел машгъул хьайибур, бюджетдин пулар чуьнуьхайбур винел акъудунин кIвалахар давам жезва. Алатай гьафтедин эхирра (17-августдиз) Махачкъаладин аэропортуна РД-дин ФОМС-дин (фонд обязательного медицинского страхования) кьил Мегьамед Сулейманов кьуна.

Гуьгъуьнлай малум хьайивал, адаз талукь яз кьве статьядай уголовный дело къарагъарнава: къуллугъдикай менфят къачуна, тахсиркаррин десте арадал гъунай ва лутувал авунай.

РФ-дин Силисдин комитетдин делилралди, М.Сулейманов кьиле  авай тахсиркаррин дестеди бюджетдинбур тир 210 миллион манат пул чуьнуьхнава.

19-августдиз республикадин меркездин Советский райондин судди кьабулай къарардин бинедаллаз Мегьамед Сулейманов кьве вацралди дустагънава. Къейд ийин хьи, РД-дин ФОМС-дин кьили вичин тахсиркарвал хиве кьунач, месэладай кьил акъуддайвал вич къанун-къайда хуьдай органар патал ачух тирди малумарна.

М.Сулеймановалай къарагъарнавай уголовный дело ахтармишун РД-дин прокуратуради хсуси гуьзчивилик кутунва.

«Лезги газет»