“Ватан” тIвар алай ватанпересвилин клубди, ам “Рекьин тийир полк” сайтдин координатор я, алай йисан апрелдин вацра школайра кIелзавай аялрин арада “Рекьин тийир полк” темадай сочиненийрин Вирироссиядин конкурс малумарна. Сайтдин адресдиз электронный почтадай чи уьлкведин жуьреба-жуьре регионрай чпин кIвалахар рекье туна, гьа гьисабдай яз Докъузпара райондин Къурушдилай тир Н.П.Самурскийдин тIварунихъ галай юкьван мектебда кIелзавай аялрини. 10-классдин ученик Радик Нурагьмедова лётчик Даниял Гъафизоваз бахшна (“Дагъустандин Маресьев”), 11-классда кIелзавай Межид Баширова “Дагъустанвияр Ватандин ЧIехи дяведин йисара” сочиненияр кхьена. Чпин яшарин номинацийрай Нурагьмедован ва Баширован кIвалахар конкурсдин жюриди виридалайни хъсанбур яз гьисабна.
Винидихъ тIвар кьунвай клубди “Дуьньядин халкьариз ва абурун культурайриз талукь пек-партал” лишандик кваз СКФО-дин аялри гъили чIугунвай шикилрин выставка-конкурсни малумарна. Ана Кеферпатан Кавказдин субъектрай, гьа гьисабдай яз Ростовский областдайни, рекье тунвай 200-далай виниз кIвалахриз килигна. Къурушрин школадин 8-классда кIелзавай Ражидин Эюбова аниз кьве шикил: “Лезги” ва “Лезгинка” рекье тунвай. Абурукай сад лагьай шикилди 3-чка кьуна, ам виридалайни хъсан шикилрин жергеда аваз Белоруссиядиз ракъурнава. Ана мукьвара “Кавказдин аялри шикилар чIугвазва” тIвар алаз выставка ачухда.
Са тIимил вахт инлай вилик Н.П.Самурскийдин тIварунихъ галай Къурушрин юкьван мектебдин директор Рустам Агъамедова Ражидин Эюбовав, Радик Нурагьмедовав ва Межид Башировав медаларни дипломар, абурун руководителрив — директордин заместитель Зингьар Къубатовав ва урус чIаланни литературадин муаллим Песен Нурагьмедовадив чухсагъулдин чарар вахкана.
“Ватан” ватанпересвилин клубдин руководитель Тимур Карданова конкурсра иштиракун патал Къурушрин школадиз куьмек гайи ксариз чухсагъул малумарзава. Абурун жергеда ава: Докъузпара райондин образованидин управленидин начальник Мадрид Магьмудов, Къурушрин юкьван школадин директор Рустам Агъамедов ва адан заместитель Зингьар Къубатов.
Руслан Исаев
