Мукьвара Сулейман-Стальский райондин  Кьасумхуьруьн спортдин залда волейболдай  акъажунар кьиле фена.  Турнир 1972-йисан 3-июндиз дидедиз хьайи ва авариядикди 2006-йисан 12-январдиз рагьметдиз фейи Ягъибегов  Вилибег  Ягъи­бе­го­вич рикIел хкуниз талукьарнавай.  Вилибег­  тIвар-ван авай  волей­болист  тир. Гьа са вахтунда ам азаддаказ­ кьур­ша­хар кьунал,  лишанар ягъунални машгъул  тир. И ре­­кьерай адахъ аквадай хьтин нетижаярни хьанай. Ам райондин ва лишанар  ягъунайни  республикадин  чемпион тир.

Муниципальный районди ва Вилибеген дах Ягъибег кьиле аваз хизанри тухвай турнирда районда машгьур 4 командади иштиракна. Акъажунар башламишдалди кьиле фейи мярекатдал райондин кьилин сад ла­гьай­ заместитель Л.Оружев, ин­формациядин агентстводин руководитель Ж.Асланов, образованидин ­управленидин начальникдин заместитель Н.Аминов рахана. Абуру турнир тебрикна ва акъажунра спортсменрихъ агалкьунар хьана кIанзавайди лагьана. Ягъибегов Ягъибега вичин рахунра рагьметлу хцихъ хьайи спортдин агалкьунрикай куьрелди суьгьбетна, меслятдивди, хъсандиз къу­гъун­риз эвер гана.

Сифте майдандал экъечIай Курхуьруьн ва Вини СтIалрин командайрин арада къугъунар къизгъиндиз кьиле фена. 2:1 гьисабдалди Курхуьруьн команда гъалиб хьана. Гуьгъуьнлай акъажунар амай командайрин ара­да­ни кьиле фена, нетижаярни ихьтинбур хьана:­

Кьасумхуьр — Агъа СтIал 0:2; Курхуьр — Агъа СтIал 2:1; Вини СтIал-Кьасумхуьр 2:1; Курхуьр — Кьасумхуьр 2:1. Нетижайри тестикьарзавайвал, командайрин арада 1-чкадиз Курхуьруьн волейболистар лайихлу хьана. Кьвед ва пуд лагьай чкаяр патал В­ини ва Агъа СтIалрин командайрин арада къугъунар да­вам хъхьана. Сулейманан ватандин спортсменрин дурумлувал артух хьана. Абу­ру 2-чка кьуна.

Турнирдин судья Небиюлаев Тимура, сек­­ретарь Аликберова Ленади чпин жа­ваб­дар везифаяр, пад ягъ тавуна, кьиле тух­вана.­

КIвенкIвечи чкаяр кьур командайриз ­та­­лукь дережайрин кубокар, дипломар, меда­лар, 25, 15, 10 агъзур манатдин кьадарда аваз пулдин премияр гана. Къугъунра тафаватлу хьайи волейболистрив гьуьрметдин грамотаярни вахкана. Къейд тавуна жедач, вич кьиляй-кьилиз хъсан къугъвай ветеран Селимов Нариманав райондин ветеранрин Советдин патай адан председатель, отставкада авай полковник А.Гьажимурадова махсус приз вахкана. Эхирдай Я.Ягъибегова спортсменриз, тамашиз атанвайбуруз, вири иштиракчийриз чухса­гъул лагьа­на, спортдал маш­гъул­ хьуниз эвер гана.

Райсудин Набиев