Дагъустандин зегьметдин ва яша­йиш вилик тухунин министерстводин пресс-къуллугъди хабар гузвайвал, Ук­раинада кьиле физвай дяведин махсус серенжемдин иштиракчийриз ва абурун хизанриз агъадихъ галай кьезилвилер ава:

— СВО-да телеф ва я хирер-кьацIар хьайи ксарин колледжрик ва вузрик экечI­навай аялриз 2500 ва 5000 манат стипендия;

—  СВО-да телеф хьайи касдин хизанда авай гьар са касдиз са сеферда 1 миллионни 250 агъзур манат куьмек;

— СВО-да телеф хьайи ксарин хизандиз пулсуздаказ чилин участок;

— школайриз ва аялрин бахчайриз учир авачиз кьубулун;

— СВО-да телеф хьайи ксарин аялар Дагъустандин колледжриз кьилдин квотадай кьабулун (квотади санлай умуми чкайрин кьадардин 10 % тешкилзава);

— Дагъустандин колледжра кIелунай гузвай пулуникай абурун аялар азад я;

— аялрин бахчайра абурун аялри пул гудач;

— алава тарсарай абурун аялар пул гуникай азад я;

— Дагъустандин гатун лагерриз абурун аялар учир авачиз фида;

— Дагъустандин школайра абурун аялриз пулсуздаказ чими тIуьнар гуда;

— очнидаказ кIелзавай студентар тир абурун аялар общежитида яшамиш хьунай гузвай пулуникай азад я;

— хизандин членриз кIвалах жагъуриз куьмек;

— чпихъ игьтияж авай ксарив яша­йишдин рекьяй къуллугъар сифте нубатда агакьарун;

— сагъламвал мягькемарун патал стационарриз рекье тун;

— музейриз, выставкайриз ва театр­риз пулсуздаказ фин ва икI мад.

Кьезилвилерикай мадни гегьеншдаказ винидихъ тIвар кьунвай чешмедин сайтдайни чириз жеда.

*  *  *

Къейд авун лазим я хьи, «Госкъуллу­гъар» порталдани СВО-дин иштиракчий­риз, ветеранриз ва абурун хизанриз талукь куьмекдикай, кьезилвилерикай кьилдин раздел арадал гъанва. Анай гьар са касдиз гьам федеральный, гьамни региондин гьихьтин куьмек, кьезил­вилер чара авунватIа, уьмуьрдин жуь­реба-жуьре шартIара абурукай гьикI менфят къачудатIа, чириз жеда.

Кьилди къачуртIа, абур СВО-да телеф хьайи касдин хизанди удостоверение (женгерин гьерекатдин ветеран) къачуниз, кIелунин ва кIвалахдин жигьетдай куьмекдиз, пулсуздаказ дарманар, психологиядин жигьетдай куьмекдиз, реабилитациядиз ва реабилитациядин такьатриз, гьакIни яша­йишдин хиляй жуьреба-жуьре кьезилвилериз талукьбур я.

И жигьетдай суалар авайбурувай  «Защитники Отечества» фондунин филиалрани чириз жеда. Абурун адресарни цIийи разделда ганва.

Чи мухбир