Махачкъалада, Россиядин Дагъустан Республикада авай ФСИН-дин Управленидин УИИ-да (Уголовно-исполнительная инспекция) азадвиликай магьрумнавай, амма аялдин 14 йис тамам жедалди вахт (отсрочка) ганвай дишегьлияр гъавурда туниз талукьарнавай мярекат кьиле фена.
Мярекатда Россиядин РД-да авай УФСИН-дин УИИ-дин начальник Сийибат Абасовади, Махачкъаладин Ленинан райондин администрациядин жемиятдин хатасузвал таъминарунин ва ришветбазвилихъ галаз женг чIугунин рекьяй отделдин начальник Фетягь Агъаширинова, Дагъустандин Муфтиятдин патав гвай просвещенидин отделдин къуллугъчияр тир Мегьамедрасул Мегьамедова ва Ибрагьим Исаева, меркездин винидихъ тIвар кьунвай райондин кьилин заместителдин везифаяр тамамарзавай Фатима Нуьгьрадиновади, «Республикадин хизандиз ва аялриз яшайишдин рекьяй куьмекар гудай центрадин» отделенийрин заведующияр тир Зарема Алиевади ва Таисия Къурбановади, Дагъустанда авай МВД-дин УКОН-дин отделенидин начальник Надежда Сейфудиновади иштиракна.
Ихтилат физвай, яни азадвиликай магьрумнавай, амма чпихъ 14 йис тамам тахьанвай аял авайвиляй вахт ганвай дишегьлияр чи республикада 100-далай виниз ава. Абурун чIехи пай инсандин личностдиз акси яз залан ва акьалтIай залан тахсиркарвилерай, гьакIни террориствилин кIвалахдик шериквиляй 5 йисалай виниз кар атIанвайбур я.
Къейд авун лазим я хьи, къенин юкъуз Россиядин Федерациядин уголовный законодательстводи, УК-дин 82-статьядал асаслу яз, са бязи ксариз, кьилди къачуртIа, кIвачел залан тир ва чпихъ 14 йис тахьанвай аялар авай дишегьлийриз, гьакIни, аялдиз диде авачирла, 14 йис тамам тахьанвай аял авай бубадизни винидихъ тIвар кьунвай «кьезилвиликай» менфят къачудай мумкинвал гузва. Ихьтин ксари аялдикай отказна виже къведач, абур аялдиз тербия гуниз мажбур я. Ахьтин ксарал уголовно-исполнительный инспекцийри гуьзчивал тухузва.
Мярекатдин иштиракчийри, пробациядин сергьятра аваз, чпикай ихтилат физвай дишегьлийриз гьихьтин куьмекар гуз жедатIа лагьана. ИкI, хизандин ивирар хуьниз, дишегьлидиз четин и макъамда психологиядин жигьетдай куьмек гуниз ва яшайишдиз, гьа гьисабдай яз кIвалах жагъуруниз, хизандихъ ва санлай обществодихъ галаз алакъаяр туькIуьр хъувуниз талукь месэлайриз артух фикир гана кIанзавайди къейдна.
Мярекатдин сергьятра аваз, ихтиярар хуьнин, психологиядин ва яшайишдин хилен экспертри меслятарни гана. Абуру азадвиликай магьрумнавай ксариз чпин ихтиярар чир хьунихъ абурун гележег патал еке метлеб авайди къейдна.
Гьа са вахтунда мугьманри агьалийрин руьгьдинни ахлакьдин тербиядиз, хизандин къиметлувал хкажуниз, наркотикар ва ички ишлемишуникай авай зарардиз талукь суьгьбетарни авуна.
УИИ-дин начальник С. Абасовади къейд авурвал, гьукумат патал еке важиблувал авай «Пробациядин» закондин кьилин макьсад дустагъдай экъечIнавай кас дуьз рекьел элячIун патал адаз лазим шартIар тешкилуникай, вири патарихъай куьмекар гуникай, кьилинди, ада мад тахсиркарвилер тавуникай, ам мад дустагъдиз аватунин вилик пад кьадай серенжемар кьабулуникай ибарат я. ФЗ агалкьунралди кьилиз акъудун уьлкведин жуьреба-жуьре субъектри кIвалах хъсандиз ва санал кьиле тухунилай, и жигьетдай кьабулзавай дуьз къараррилай ва серенжемрилайни аслу тирди, Дагъустанда, и жигьетдай вири мумкинвилерикай менфят къачуналди, ахьтин ксарин къайгъударвал чIугвадайди къейдна.
Рагнеда Рамалданова
