Алай вахтунда республикада коронавирусдиз акси рапар ягъун давам жезва. 24-февралдиз Дагъустандин здравоохраненидин министерстводи раижнавай делилралди, ахьтинбурун кьадар 8 798 кас тир. Республикада и серенжем кьилиз акъуддай 80 пункт ачухнава. “Гам-Ковид-ВАК” вакцинадин 18392 доза чи региондиз агакьнава.
И йикъара гуьгьуьллудаказ рапар ягъайбурун арада Дагъустандин госмедуниверситетдин (ДГМУ) студентарни ава. ИкI, медицинадин вуздин студентри чпин чешнедалди амайбуруз и кар авуниз эвер гузва. ГьикI хьи, пешекарри жуван ва багърийрин сагъламвални уьмуьр хуьн патал азардиз акси рапар ягъун виридалайни менфятлу рехъ яз гьисабзава.
COVID-19 азардиз акси рапар ягъун патал студентри, муаллимри ва вузда зегьмет чIугвазвай амай ксарини виликамаз, яни 11-18-февралдалди, ивидик антитела кватIа чирна. Раб ядалди виликни духтурар абурун гьалдиз килигна, бедендал ифин алатIа, дамарра ивидин гьерекатдин йигинвал, сатурация ахтармишна. Анжах ахпа рапар ягъунив эгечIна. И серенжем кьилиз акъудай виридан гьал хъсанзава. “Россиядин вакцинадал клинический гзаф кьадар ахтармишунар кьиле тухванва. Адан виниз тир менфятлувал ва хатасузвал вири дуьньяда субут хьанва. Рапар янавайбурун — студентрин ва амай къуллугъчийрин гьал чи гуьзчивилик ква. Виридан гьал хъсанзава. За жуван ва багърийрин, иллаки чIехи яшара авайбурун, сагъламвал хуьн патал жувазни азардиз акси раб ягъун кьетIнава”, — лагьана студент-медик ва коронавирусдин азардин месэлайрай тешкилнавай call-центрадин оператор Асият Абакаровади.
Графикдал асаслу яз, республикадин амай вузрин студентриз ва муаллимризни рапар ягъун пландик ква.
«Лезги газет»
