Дидед чIаларин йикъаз талукь шад мярекат Махачкъала шегьердин 61-нумрадин юкьван школадани гурлудаказ кьиле фена. (Директор — Къ.О.Дибиров, завуч — Х.Ж.Эльдаров).
Иниз республикадин писателрин Союздай, милли газетрин редакцийрай хейлин мугьманризни — чпи милли чIаларал теснифзавай ксариз теклифнавай. Ам мектебдин далдамчийрин кружокдин членри устадвилелди тамамарай дагъвийрин авазралди ачухна, гьа тегьерда, илгьамдин нев кваз, давамни хьана.
И кардал школадин милли чIаларинни литературайрин методобъединенидин руководитель, пешекарвилинни насигьатчивилин, педагогвилин устадвал хкажунин рекьерай махсус Грамотадин сагьиб М.С. Эльдаровади вичин ва мектебдин аялринни муаллимрин вири мумкинвилер желбнавай.
Мярекатда мектебда чирзавай Дагъустандин саки вири халкьарин — урус, лезги, авар, къумукь, яхул, дарги, табасаран — чIаларал аялри устадвилелди шиирар кIелна, манияр тамамарна, сегьнеяр къалурна.
Атанвай мугьманрикай аялрин рикIерик ашкъи, гьевес кутадай гафар “Лезги газетдай” — шаир ва публицист Мердали Жалилова, писателрин Союздай — Дагъустандин халкьдин шаир Аминат Абдулманаповади, авар чIалал акъатзавай журналрин редакторар тир Тубхат Зургаловади, Мегьамед Патахова лагьана.
Мярекатда иштиракай лезги ашукь Алихана вирибур вичин чуьнгуьрдин сесерик кваз лагьай манийралди шадарна.
Эхь, им гьакъикъатдани меркездин цIийи ва лап чIехиди тир мектебда чи милли вири чIаларин гурлу сувар тирди аялрини, муаллимрини, мугьманрини гьиссна.
Милли чIалар чи руьгьдин къакъудиз тежер пай ва девлет я!
Чи мухбир
