СтIал Сулейманан 150 йисан ва райондин 90 йисан юбилейрин сергьятра аваз, и йикъара Сулейман-Стальский райондин И.Тагьирован тIварунихъ галай медениятдин дараматдин гъвечIи залда 8 ва 11-классра кIелзавай аялрин арада СтIал Сулейманан шиирар фасагьатдаказ, устаддаказ кIелунин конкурс кьиле фена.
«Лезги газетдиз» райондин администрациядин пресс-къуллугъди хабар гузвайвал, конкурс шаирдин шиирар машгьурунин, адан уьмуьрдинни яратмишунрин рехъ хъсандиз чирунин, хайи чIал кIанарунин, ватанпересвилин гьиссер кутунин ва милли медениятдиз гьуьрметунин макьсадралди тешкилна.
Конкурсдин иштиракчийриз Агъа СтIал-Къазмайрин «Чубарук» бахчадин аялри кьуьлерин нумраяр къалурна.
Жюридин дестедик шаир Сажидин Саидгьасанов, ИМЦ-дин хайи чIаланни эдебиятдин методист Назират Азимова, Курхуьруьн М.Рагьимован тIварунихъ галай 1-нумрадин ва Агъа СтIал-Къазмайрин мектебрин муаллимар Гуьзел Межидовани Эльмира Фатахова квай.
Аялри устаддаказ, фасагьатдаказ, гьиссер кваз халкьдин рикI алай шаирдин эсерар кIелна. Эхирдай жюридин дестеди лап хъсандиз кIелайбурун тIварарни тайинарна.
ИкI, 11-классда кIелзавайбурун арада 1-чка Ирада Жафаровади (Кьасумхуьруьн 1-нумрадин мектеб), 2-чкаяр Сабина Султановади (Эминхуьруьн А.Саидован тIварунихъ галай мектеб), Диана Гьабибулаевади (Герейханов хуьруьн Р.Османован тIварунихъ галай 1-нумрадин мектеб), 3-чкаяр Адам Исламова (Кьулан СтIалрин Р.Халикьован тIварунихъ галай мектеб), Артур Тажибова (Кьасумхуьруьн 2-нумрадин мектеб), Эмиля Пирмегьамедовади (Вини СтIалрин мектеб) кьуна.
8-классда кIелзавайбурун арада 1-чка Радмила Мегьамедовади (Курхуьруьн 2-нумрадин мектеб), 2-чкаяр Зилефат Мегьамедовади (Вини СтIалрин мектеб), Мегьамед Аллагькъулиева (ЦIийихуьруьн мектеб), Хадижа Рамазановади (ЦицIигърин мектеб), 3-чкаяр Жамиля Абулвагьабовади (Герейханов хуьруьн М.Дибирован тIварунихъ галай 2-нумрадин мектеб) ва Гуланагъа Агьмедовади (Агъа СтIал-Къазмайрин мектеб) кьуна.
Тафаватлу хьайибуруз Сулейман-Стальский райондин образованидин управленидин патай грамотаяр гана.
«Лезги газет»
