И йикъара Кьурагь райондин КIирийрин спортдин интернат-мектебда генерал Муьгьуьдин Къагьриманован экуь къамат рикIел хкуниз талукьарна, 4-сеферда яз, волейболдай турнир кьиле фена. Идакай «Лезги газетдиз» райондин администрациядин пресс-къуллугъди хабар гузва.

Спортдин мярекатда райондин кьил Замир Азизова, информациядин технологийрин ва печатдин центрадин начальник Джаврудин Халикьова, райондин ветеранрин советдин председатель Фахрудин Мирзоева, ФС-дин ва ДМ-дин отделдин начальник Рамиз Рамазанова ва масабуру иштиракна.

Мярекат 10-классда кIелзавай Альбина Батмановадини Анвар Аллагькъулиева кьиле тухвана. Мектебдин выпускникри РФ-дин ва РД-дин пайдахар хкажна.

Турнир ачух жедалди тебрикдин гафар мектебдин директор Надир Тагьирова лагьана. Генерал Къагьриманован уьмуьрдин рекьикай, къуллугъдикай тарихчи муаллим Славик Къаибханова ихтилатна.

Шад мярекатдал райондин кьил Замир Азизовани тебрикдин гафар лагьана. Ада мектебда кIелзавайбуруз уьмуьрда ва Ватандиз къуллугъ авунин карда чIехи агалкьунар къазанмишай генерал Къагьриманов хьтин баркаллу рухвайрилай чешне къачун герек тирди лагьана.

Мектебда кIелзавайбурухъ элкъвена муькуь мугьманарни рахана. Гуьгъуьнлай Кьурагьрин 1-нумрадин мектебдин, МЧС-дин, райондин ОМВД-дин, райондин администрациядин, КIирийрин спортдин интернат-мектебдин командайрин арада волейболдай турнир кьиле фена.

Сад лагьай чка КIирийрин спортдин интернат-мектебдин командади кьуна. Кьвед ва пуд лагьай чкайрал ОМВД-дин ва Кьурагьрин 1-нумрадин мектебдин командаяр хьана. Вири командаяр медалралди, грамотайралди, пулдин пишкешралди ва къиметлу савкьатралди къейдна. Сад лагьай чка кьур командадиз генерал Къагьриманован кубокни гана.

«Лезги газет»