10-сентябрдилай 26-сентябрдалди Сулейман-Стальский райондин Герейханован хуьруьн спортдин майдандал и хуьруьнви, милициядин старшина, викlегьвилин ордендин сагьиб, хаталу бандитар кьадайла кечмиш хьайи Роберт Къазиагьмедов рикlел хкуниз талукьарнавай футболдин турнир 8-сеферда яз кьиле фена.

«Лезги газетдиз» райадминистрациядин пресс-къуллугъди хабар гузвайвал, турнир акьалтlарунин мярекатда райондин кьилин сад лагьай заместитель Л.Оружева, Россиядин МВД-дин Сулейман-Стальский райондин отделдин начальникдин заместитель Тагьир Мегьамедова, Герейханово хуьруьн кьил Руслан Алдырова, райондин физкультурадин, спортдин, туризмдин ва жегьилрин крарин рекьяй комитетдин директор Надыр Эфендиева ва Роберт Къазиагьмедован багърийри иштиракна.

Спортдин мярекат Кьиблепатан Дагъустанда футбол машгьур авунин, спортсменрин арада дуствилин алакъаяр мягькемарунин, алакьунар авай футболистар винел акъудунин ва абуруз куьмек гунин мураддалди тешкилзава.

Турнирда райондин 10 командади иштиракна. Нетижада 1-чка «Агъа Стlалар», 2-чка «Герейхановский 1» ва 3-чка «Кьасумхуьр» командайри кьуна.

«Даркlуш-Къазмаяр» команда кьуд лагьай чкадал хьана. Гъалиб хьайи командадиз кубок гана, финалдин ва ярумчух финалдин иштиракчияр грамотайралди, дипломралди, медалралди ва пулдин пишкешралди къейдна.

«Лап хъсан судья» номинациядай Ренат Мегьамедоваз, «Лап хъсан къапучи» номинациядай Имам Къарахановаз, «Лап хъсан защитник» номинациядай Эмир Лукьмановаз, «Лап хъсан полузащитник» номинациядай Маидин Гьасановаз ва «Лап хъсан гьужумчи» номинациядай Руслан Саидалиеваз махсус пишкешар гана.

«Лезги газет»