Хазран Кьасумов
Агъа-СтIалдал и мукьвара Дагъустандин дишегьлийрин союздин векилар атанвай. Республикадин дишегьлийрин союздин председатель Интизар Мамутаева кьиле аваз и тешкилатдин векилрин чIехи дестедиз СтIал Сулейманан райондин администрацияди,чкадин дишегьлийрин советди, муниципалитетдин администрациядин культурадин, образованидин управленийри ва райондин информациядин агентстводи теклифнавай.
Багьа мугьманар сифте райондин кьил Саид Темирхановахъ галаз гуьруьшмиш хьана. Гуьгъуьнлай абур СтIал Сулейманан музейдиз фена. Ина абурун вилик Кьасумхуьруьн 3-нумрадин аялрин бахчада тербия къачузвай бицIекри, милли парталар алаз, зиринг кьуьлер тамамарна. Мугьманри абуруз гурлу капар яна.
СтIал Сулейманан гуьмбетдал цуьквер эцигайдалай гуьгъуьниз музейдин гьаятда авай, чIехи шаирди цайи ва адан сериндик ацукьна гуьзел эсерар теснифай хатрутдин тарцик райондин ЦТКНР-дин гьевескарри ва школьникри багьа мугьманриз концертдин программа къалурна.
Дагъустандин дишегьлийрин союздин векилар СтIал Сулейманан чилел атун тебрикуналди, мярекат райондин дишегьлийрин советдин председатель Айишат Кьасумовади ачухна.
Чеб хушвилелди кьабулунай райондин кьилевайбуруз, мярекатдин тешкилатчийриз И.Мамутаевади рикIин сидкьидай сагърай лагьана.
— Къе чун Дагъустандин шииратдин классик, чи рикI алай шаир СтIал Сулейманан хуьруьз, кIвализ атанва. И кIвале ам яшамиш хьана, ина ада вичин гуьзел жавагьирар теснифна, — лагьана Интизар Мамутаевади. — Заз акI я хьи, чна вичин 155 йис тамам хьун къейд ийизватIани, Сулейман накь и кIвале авай. Ахьтин шаирар эбеди я… Райондиз гьахълудаказ арифдаррин, шаиррин район лугьузва. Алава хъийиз кIанзава хьи, и район генералрин районни я.
Интизар Мамутаевади СтIал Сулейманан камаллувилиз ва шаирвилиз еке къимет гана, адан шиирар ва Эффенди Капиеван «Шаир» ктабдай камаллу келимаяр хуралай кIелна.
— Къуй Сулейманан чилел гьамиша манидин сес хьурай!, — лагьана вичин рахунрин эхирдай И. Мамутаевади.
Курхуьруьн дишегьлийрин советдин председатель Лейла Уружбеговади вичи кхьенвай «Сулейман» шиир кIелна, Ахцегь райондин дишегьлийрин советдин председатель Таира Муспагьовади СтIал Сулейманан «Марият» мани тамамарна.
Зурба хатрутдин тарцин сериндик тешкилай мярекатдал Сергокъала, Дербент районрин дишегьлийрин советрин председателар тир Жамиля Айсаева, Умужат Гусаева, Дагъустандин Огни шегьердин дишегьлийрин советдин председатель Фероза Мегьамедова ва масабур рахана, СтIал Сулейманакай, адан жавагьиррикай разивилин гзаф хуш келимаяр лагьана, райондин гуьзелвилел чпин гьейранвал къалурна.
Гуьгъуьнлай мярекатдин тешкилатчийри дишегьлийриз СтIал Сулейманан музейдиз теклифна. Анин илимдин къуллугъчи Фейзудин Мамедова мугьманриз музейда авай экспонатрикай, чIехи шаирдин уьмуьрдин ва яратмишунрин рекьерикай тамам ихтилат авуна, абурун патай хьайи суалриз жавабар гана.
Шаирдин музейда авай экспонатри, музейдин къуллугъчиди авур итижлу ихтилатри гьейранарай, гуьгьуьлар хкажай векилар музейдихъ галай гуьзел багъда кIватI хьана, атирлу чаярни ширинлухар алай суфрадихъ «элкъвей стол» кьиле фена. Ам ачухуналди, Интизар Мамутаевади адан иштиракчийрикай танишвал гана. «ХХ асирдин Гомеран уьмуьр ва яратмишунар» темадай анал гзафбур рахана.
— Къе чун зурба шаирдин мярекатдиз атанва, — лагьана Дагъустандин дишегьлийрин союздин Президиумдин член, РД-дин милли сиясатдин ва динрин крарин рекьяй министерстводин отделдин начальник Хасайбат Валиевади. — Инал Интизар Асадулаевнади лагьайвал, СтIал Сулейманан райондай 14 генерални акъатнава. Абурукай сада — Энрик Селимович Муслимова — чи министерстводиз регьбервал гузва. Райондай акъатай шаиррал хьиз, чна генералрални, машгьур алимрални дамахзава.
Мярекатдал «Дагъустанн» РГВК-дин кьилин редактор Зарипат Курамегьамедовади чпи СтIал Сулейманакай гьазурзавай цIийи фильмдикайни суьгьбетна.
СтIал Сулейманан яратмишунрикай анал «В единстве наша сила» тешкилатдин регьбер, Дагъустандин дишегьлийрин союздин жавабдар секретарь Патимат Абакарова, Россиядин ФСБ-дин Дагъустан Республикадин пограничный подразделенидин дишегьлийрин советдин председатель Ольга Арслангереева, Избербаш, Къизляр шегьеррин дишегьлийрин советрин председателар тир Гьава Исакьова, Светлана Алибегова, СВО-да телеф хьайи аскердин диде Шамсият Омарова, СВО-да телеф хьайи аскердин уьмуьрдин юлдаш Эльза Мамедова, Табасаран райондин дишегьлийрин советдин председатель Айханум Рашидова, Гуниб райондин дишегьлийрин советдин председатель Патимат Абакарова рахана, СтIал Сулейманан тIвар, адан эсерар виш йисара халкьдин рикIера амукьдайди къейдна.
Дишегьлийрин тешкилатрин векилар СтIал Сулейманан райондин администрациядин информациядин агентстводин регьбер Гуьлера Камиловади тебрикна, шаирдин уьмуьрдин рекьикай ва яратмишунрикай итижлу вакъиаяр рикIел хкана. Ада вичин рахунар «ХХ асирдин Гомеран» хтул, шаир Лидия Стальскаядин «Хатрутдин тар» шиир кIелуналди акьалтIарна.
«Шииратдин Меккадиз» мугьман хьунай, Сулейман бубадикай ва адан яратмишунрикай таъсирдай келимаяр лугьунай РД-дин культурадин лайихлу къуллугъчи, музейдин директор Лидия Стальскаяди сагърай лагьана, мугьманриз савкьатар ва шаирдин шииррин ктабар багъишна.
