Хазран Кьасумов
CтIал Сулейманан райондин гуьрчег ва мублагь пипIерикай сад тир КIварчагъ дередиз гьахълудаказ къуччагърин дере лугьузва.
КIварчагърин военный учетдин столдин начальник Кемран Гьабибулаева чаз лагьайвал, дередин хуьрерай саки 70 касди СВО-да ватанпересвилин буржи кьилиз акъудзава. НуьцIуьгърин хуьре, махсус серенжемдин 8 иштиракчидин шикиларни аваз, «Дамахдин ва баркалладин аллея» ачухнава.
— КIварчагъай тир Къурбаналиеврин хизандай пуд хци Донбассда СВО-да иштиракзава. Абуруз пудазни алай йисуз «Дагъустандин халкьдин Игит» лагьай тIвар ганва, — лагьана, Кемран Гьабибулаева.
Хизандин кьил Сережа Абдулкеримовича ва адан уьмуьрдин юлдаш Суварат Абдулвагьидовнади чун чина хъвер аваз кьабулна. Чна абурухъ галаз хизандикай, зегьметдин рекьикай ихтилатар авуна. Ери-бине Сиртичай тир табасаранви дишегьли Суварат Абдулвагьидовнади рухвайрикай куьрелди лагьана: «Вири кьегьалри хьиз, зи гадайрини — Руслана, Марата ва Радика — дяведин махсус серенжемда иштиракзава».
— Абурухъ галаз алакъа авани?
— Эхь, телефондай рахазва. Хъсан я лугьуда. Кьве гада отпускадизни хтайди я.
Сережа Абдулкеримовичан ихтилатрай якъин хьайивал, пуд гададини икьрардин бинедаллаз къуллугъзава. ЧIехи хва Руслана виликдай Сирияда женгинин гьерекатра иштиракна. Донбассда дяведин махсус серенжем башламиш хьайи сифте йикъарилай ада гьана иштиракзава. Ам халис ватанперес, хура хци рикI авай дагъви я. Бубади лагьайвал, Русланахъ 15 медаль ава.
ЧIехи стхадилай чешне къачуна, Марата ва Радикани СВО-да ватанпересвилин буржи жуьрэтлудаказ кьилиз акъудзава. Маратахъ женгинин 4, Радикахъ 5 медаль ава. Аферин ва баркалла Игит рухвайриз!
Кемран Гьабибулаева Радиказ телефондай зенг авуна, журналистдиз стхайрикай газетдиз макъала кхьиз кIанзавайдакай лагьана.
«Чна газетдиз кхьидай кьван вуч ийизва кьван, хиве авай везифа я кьилиз акъудзавайди», — лагьана аскерди.
Фикир гайила, хуьре яшамиш жезвай, зегьметчи хизанда чIехи хьайи, тербия къачур пуд стхади контрактникар яз къуллугъ авун, махсус серенжемда иштиракун — им халис игитвал я. Им, гьелбетда, диде-бубади кIвале, хизанда, муаллимри школада гайи тербиядин нетижа я.
— ГъвечIи чIавалай эгечIна гадайриз насигьатар гуз хьана: чIехиди-гъвечIиди чир хьухь, масадаз жедай куьмек це, гьич са касдинни хатур хамир, Ватан кIан хьухь, хуьруьз-кIвализ, жемятдиз менфятлу инсанар яз чIехи хьухь ва икI мад, — ихтилатзава С.Къурбаналиева.
1964-йисуз дидедиз хьайи Сережа Къурбаналиева юкьван школа, 1989-йисуз Воронеждин педагогикадинни индустриядин техникум акьалтIарна, Каспийск шегьерда «Дагдизель» заводда мастер-механиквиле, хайи хуьре, Сургутда, Москвада, Ставрополда зегьмет чIугуна.
«КIвалахдик квачир мишер муьрхъуь кьада» гафар рикI алаз тикрардай Сережа Абдулкеримовича хуьре, лапагрин гъвечIи ятахар эцигна, хизанни галаз зегьмет чIугвазва.
С. Къурбаналиевади яргъал йисара республикада кIвенкIвечибурукай сад яз хьайи «Коммуна» совхозда уьзуьмчивилин бригадада рабочийвиле гьакъисагъвилелди зегьмет чIугуна. Намуслу кIвалахдай адаз са шумудра гьуьрметдин грамотаяр, къиметлу пишкешар гана, хейлин йисара адан шикил совхоздин Гьуьрметдин доскада хьана.
Сережа ва Суварат Къурбаналиеврихъ 5 хтул ава. Абуру чIехи бубадизни дидедиз рикIин шадвал гузва.
Къуй СВО-да авай гьар са кьегьал чпин хизанрин, диде-бубайрин патав сагъ-саламатдиз, гъалиб хьана, хтурай!
