Халкьди чIехи авур…

Дагъустанда  ва  чIехи  шаирдин тIвар алай вири чкайра  СтIал  Сулейманан  шииратдин йи­къар кьиле физвайдакай чна алатай нумрада хабар ганвай. Къе а кар генани гурлудаказ давам жезва. И чин чна гьа кардихъ галаз алакъалу яз гьазурнава.

Шаир Расул Гьамзатова  гзаф сеферра  тикрарай  “Чна  Сулейман ваъ, Сулеймана чун хкажна, дуьнь­ядиз машгьурна” гафарин метлеб  садрани агъуз аватдач.

Маса келимаярни важиблубур я: “Сулейманаз чун ваъ, чаз ам артух герек я. Сулейман хьтин шаир ганвай халкь я гъвечIиди, я зайиф­ди, я вичивай вич хуьз тежердини туш!”

Чахъ, Шарвили хьиз, Сулейманни гала! Вичи Эминавайни, ­Саидавайни, вичелай вилик хьайи вири арифдарривай ирс къачур  халкьдин хва!

Инал Михаил Шолохова лагьай­ гафарни рикIел хквезва: “СтIал Сулейман халкьди вичи чIехи авур ша­­иррин жергедик акатзава. Шаирди хайи халкьдин фикирар, адан шадвилер ва хажалатар чимиз-чимиз инсанар гьейранардай хьтин ма­нийриз-шиирриз элкъуьрна. Ашукьдин къуватдалди девлетлу хъхьай абур эбеди амукьун патал цIийи кьилелай халкьдин арадиз хъфена”. “Ашукь” гаф писателди “ашукь хьанвай” манада ишлемишнава.

Къенин аямда алаш-булашди гьикьван кьил хкажнаватIани, гьахъ­сузвилери басрухар  гузва­тIа­ни, СтIал Сулейманан шииратди чи  руьгьдин пак къуватар артухарзава.

Архайинвал тежез рикIин,

АтIайла кесибдин мумкин,

Я ахварал тефиз секин,

Куьгьне хире тIал гьатайла.

 

Гагь регъуь жез, гагь-гагь кичIез,

ПIузарар хъуьрез, рикIер шез,

Эхир кьилни эхиз тежез,

Авахьна буьвел ацIайла…

Ихьтин жавагьирар, алатай асирдин эвел кьилера кхьейбур ятIа­ни, къенин йикъарихъ галаз гьи­кьван кьазва! Куьгьне хирерни бархунар тIимил жезвач, амма абур, “ацIай буьвелар” хьиз, авахь­­дай югъни алукьдайдал шак алач.

Вахт санал акъвазнавач. Ада вири чпин чкайрал тайин хъийида. СтIал Сулейманан шииратдин сувар мубаракрай, гьуьрметлу кIел­­­­завайбур!

«Лезги газет»