Играми газет кIелзавайбур! Мукьвара Махачкъалада “Пак Къуръан ва адан манайрин таржума лезги чIалал” тIвар алаз лезги чIалал Къуръандин аятрин манаяр чапдай акъатнавайдакай чна виликдай хабар ганай. Газет кIелзавайбур аятрин баянрихъ галаз мукьувай танишарунин мураддалди абурукай бязибур са шумуд нумрадизни акъудна. Къведай — 34-нумрадилай Къуръандин аятрин баянар гун акъвазарзава. Лезги чIалал аятрин манаяр кIелдай ашкъи авайбурувай “Пак Къуръан ва адан манайрин таржума лезги чIалал” ктаб къачуз жеда. Ам “Лезги газетдин” редакциядай 1000 манатдай маса гузва.
(Эвел-23-28,30-32-нумрайра)
- Ва (рикIел гъваш вуна эй, Пайгъамбар) Ибрагьима КIвалин (Кябедин) бинеяр (ва я цлар) хкажай вахт ва Исмаилани (чпини дуьа ийиз): “Чи Рабби! Кьабула (Вуна) чи патай (диндар крар ва дуьаяр), гьакъикъатда, (са) Вун вири ванер Къведайди, вири Чидайди я эхир!
- Чи Рабби! Чакай (кьведакайни) Ваз муьтIуьгъбур (мусурман ксар) ая ва чи несилрикайни Ваз муьтIуьгъ (мусурман) уьммет ая. Ва къалура (чира) Вуна чаз чи “ибадатдин чкаяр (ва къайдаяр)” ва (кьисмет-кьадар ая чаз чна туба авун ва) кьабула (Вуна) чи тубани, гьакъикъатда, (са) Вун тубаяр гзаф Кьабулдайди, Регьимлуди я эхир!
- Чи Рабби! Ва рекье тур Вуна абурун патав расул (абурукай) чпикай, абуруз Ви аятар кIелдай, абуруз Ктаб ва арифдарвал (Сунна) чирдай ва абур михьи ийидай. Гьакъикъатда, (са) Вун лап Гужлуди (Къудратлуди), Арифдарди (Камаллуди) я эхир!
- Ва вуж Ибрагьиман диндикай элкъведа (яргъаз жеда) кьван, (са) вичи вич сефигьдай кьурдалай гъейри?! Гьакъикъатда, Чна ам и дуьньядани хкянава (расул ва пайгъамбар яз). Ва гьакъикъатда, ам Эхиратда (чIехи дережа авай) салигьбурукай (диндарбурукай) жеда.
- Ингье адан Раббиди адаз лагьана: “МуьтIуьгъ хьухь (михьиз вун Заз)!” Ада лагьана: “(Михьиз) муьтIуьгъ я зун алемрин Раббидиз!”
- Ва веси (эмир) авуна Ибрагьима а кар (а дин) вичин рухвайриз ва Йакъубани: “Эй, зи рухваяр! Гьакъикъатда, Аллагьди квез и дин (Ислам) хкянава; (гьамиша кьиле твах куьне а дин) ва анжах мусурманар яз рекьидайвал ая куьн!” .
- Я тахьайтIа куьн (эй, чувуд дин гвайбур) Йакъубав ажал агакьайла (анал) шагьидар тирни, ада вичин рухвайриз (вири кIватIна) лагьай чIавуз: “Куьз (Низ) куьне залай гуьгъуьниз ибадат ийида” Абуру лагьана: “Чна ибадатда ви Илагьидиз (Аллагьдиз) ва Илагьидиз ви бубайрин: Ибрагьиман, Исмаилан, Исгьакьан — Сад тир Илагьи яз. Ва чун са Гьадаз мусурманвалзавайбур (муьтIуьгъвалзвайбур, итIаатлубур) я” .
- А уьммет (Ибрагьим пайгъамбар ва адан несилрин еке жемят) хьана алатнава. Адаз (а уьмметдиз) вичи къазанмишайди жеда ва квез — куьне къазанмишайди жеда ва (абуру) авур крарин патахъай квевай хабар хкьадач (жавабдарвал истемишдач).
- Ва абуру (чувудри ва хашпарайри — гьарда вичин диндиз эвериз) лагьана (мусурманриз): “Куьн хьухь чувуд дин гвайбур ва я насараяр (Иса пайгъамбардин рехъ тухузвайбур), куьн дуьз рекье жеда”. Лагь (вуна абуруз, эй, Пайгъамбар): “Аксина, (дуьз рехъ я чун вири табий хьун) диндиз Ибрагьиман (вични) гьаниф тир (вири чIуру динар туна Аллагь сад тирди тестикьарзавай диндихъ ян ганвай) ва тушир ам мушрикрикай.
- Лагь куьне (эй, мусурманар, чувудриз ва хашпарайриз): “Чна иман гъанва (Сад тир) Аллагьдихъ ва чаз (авудна) ракъурнавайдахъ (Къуръандихъ) ва (авудна) ракъурнавайдахъ Ибрагьимаз, Исмаилаз, Исгьакьаз, Йакъубаз ва “сихилриз” (Йакъубан веледрикай хьайи цIикьвед сихилдин пайгъамбарриз) ва ракъурнавайдахъ Мусадиз (Тавратдихъ) ва Исадиз (Инжилдихъ) ва ракъурнавайдахъ пайгъамбарриз чпин Раббидин патай (вири Ктабрихъ), чна абурукай (пайгъамбаррикай) садан ва муькуьдан арада фаркь твазвач (садахъ иман гъиз, муькуьдахъ кафирвализ) ва са Гьадаз чун мусурманвалзавайбур (муьтIуьгъвалзвайбур, итIаатлубур) я”.
- Ва эгер абуру куьне гъанвай иман хьтин иман гъайитIа (инанмишвал авуртIа куьне инанмишвал авунвайвал вири пайгъамбаррихъ, Къуръандихъ), дугъриданни, абур дуьз рекьел атанваз жеда ва эгер абур кьулухъ элкъвейтIа (а кардикай), гьакъикъатда, абур (гьахъдикай еке) чаравиле (ва квез аксивиле) жеда ва Аллагьди вун абурукай (абурун писвилерикай) хуьда. Ам — вири ванер Къведайди ва вири Чидайди я эхир!
Таржума — Ямин Мегьамедов
