Чи халкьдиз камаллу насигьатар, ибараяр, мисалар, мискIалар пара ава. Абурук и ихтилатни акатзава. Са абдал яни, авам яни, ада хъиляй нетIер авай кавал, цIай яна, каналдай. Заз гила США-дин ва Евросоюздин кьилевайбурун амаларни гьа абдалдинбур хьиз аквазва. Са никай, квекай ятIани хъел атана лугьуз, США-ди Китай сад лагьай душман яз малумарзава, Россиядал санкцияр илитIзава. Адалай Евросоюздини чешне къачузва ва чпин къадагъаярни эцигзава.
Авайвал лагьайтIа, хъилер ава “гадайриз”. Россиядик Крым эхкечI хъувурдалай, Донбассди Украинадин фашистрин, бандеровчийрин гьукуматдилай аслу туширвал, чпин кьилдинвал малумарайдалай, Россиядин Федерациядин куьмекни галаз Сириядин Республикади международный террористрин бандаяр кукIварайдалай ва абуру кьунвай чилер азад авурдалай гуьгъуьниз.
Виридалайни еке ажугъ авиляй ава хьи, Пентагондиз, НАТО-диз кIандайвал хьанач, Россия Ельцинан, “Бушан вечрен кIвачер” къизилдихъ маса къачузвай, гужлу яракьар, техника руьхъ-руьхъзавай, халкь каша твазвай, миллетар сад-садал элкъвезвай Россия яз амукьнач. Россия къуватлу, къудратлу, дуьньядин майданда авторитетлу зурба уьлкведиз элкъвезвайди акурла, абур пад-пад жезва, сакIани тежедайла, Навальный хьтин хаинрикай, къенепатан агентрикай далда кьуна, кIуф ядай, йигин еришралди физвай арабадин чархара лашар твадай амаларзава. Океанрилай анихъ галайбуруз чизвач хьи, Россия хьтин уьлкведиз абурун гьерекатар япай чIар акъудайдайни туш.
Ингье 2-мартдиз США-ди, са сят алатайла, Евросоюздини Россиядин Федерациядиз санкцияр малумарна. Вуч лугьузва тапан демократиядин сагьибри? “Россиядин оппозиционерриз (гъавурда гьатин — хаинриз) датIана акси кIвалах тухунай жавабдарвал хиве гьатуниз килигна…” РФ-дин силисдин Комитетдин кьил Александр Бастрыкин, Генеральный прокурор Игорь Краснов (ада Роскомнадзордиз Навальныйдин тереф хуьн патал куьчейриз экъечI лугьуз гузвай сайтрал сергьят эцигунин тапшуругъ ганалда), ФСИН-дин кьил Александр Калашников ( ада 17-январдиз Россиядиз хтай Навальный кьунин буйругъ ганалда), Росгвардиядин кьил Виктор Золотов (ЕС-дин фикирдалди, ада Навальныйдин тереф хуьзвайбурун аксина гвардиядин дестеяр ишлемишналда) санкцийрин тагъма эцигнавайбурук акатнава. Малумарзавайвал, абуруз Евросоздиз ва адан финансрин къурулушриз рекьер агалнава. Россиядин талукь пресс-къуллугъри хабар гузвайвал, винидихъ тIварар кьур ксарин активар Европада авач. Я абуру Евросоюздин финансрин къурулушрикай менфятни къачузвайди туш.
Винидихъ тIварар кьур ксарилай гъейри, США-дин ва Евросоюздин санкцийрик РФ-дин Президентдин администрациядин кьилин сад лагьай заместитель Сергей Кириенко, РФ-дин оборонадин министрдин заместителар Алексей Криворучко, Павел Попов, уьлкведин президентдин къенепатан сиясатдин рекьяй управленидин кьил Андрей Ярин, Сибирдин федеральный округда РФ-дин Президентдин тамам ихтиярар ганвай векил Сергей Меняйло, РФ-дин оборонадин министерстводин илимдин 27 центр, илимдинни ахтармишунардай центральный институт ва Россиядин органический химиядин ва технологийрин илимдинни ахтармишунардай госинститут акатзава. Ибурал мадни ГРУ-дин виликан полковник Сергей Скрипаль ва адан руш Юлия зегьерламишунин тахсир кутунвай Анатолий Чепига ва Александр Петровни алава хъувунва.
Украинани, Навальныйни, Скрипални ва гьа ихьтин маса делиларни кьуру багьнаяр я, США-дивай Россиядин къудрат виниз акъатун, ада дуьньяда мягькем чка кьун, вич садалайни аслу туширди тайин краралди малумарун эхиз жезвач. США-дин авторитет садлагьана агъуз аватнава. Иллаки — Кьиблепатан Америкадин, Азиядин, РагъэкъечIдай патан уьлквейрин арада. Гьавиляй США-дин цIийи госсекретарди вири дуьньядиз ван къведайвал малумарзава: “Чна мад маса уьлквейра къуватдалди демократия твадач, чаз хуш, чи чIала авачир пачагьар дегишардай серенжемра иштиракдач…”
И мукьвара кьиле фейи президентдин къизгъин сечкийрилай гуьгъуьниз Джо Байденаз США-дин авторитет чкадал хкиз кIанзава. Амма им регьят кар туш. И кардин гъавурда авайвиляй ада США-дин кIириник акат тийизвай Китайдикни Россиядик рикIел атай кьван тахсирар кутазва, экономикадиз зиян гудай серенжемар тешкилзава. ИкI, газдин “Северный поток” линиядал кIвалахар акъвазарун патал анал зегьмет чIугвазвай Европадин хейлин фирмаярни компанияр кIеве тваз алахънава, абуруз санкцияр малумарзава. Ихьтин серенжемрин тереф Украинадин президент Владимир Зеленскийди хуьзвайвал акурла, хъвер къвезва. И йикъара Украинадиз Европадин советдин председатель Шарль Мишель атана ва ам Зеленский галаз Луганский областдин Украинадин гуьзчивилик квай районриз фена. Журналистрин вилик экъечIайла, Зеленскийди Мишелавай тIалабзава: “Россияди чаз тежедай хьтин кьве ягъун кьуна: Крым вахчуна. Донбассда аслу тушир кьве республика арадал гъана. Гила лап кар алай пуд лагьай ягъун кьаз — газдин “Северный поток” кардик кутуна, Украина газдикай магьрум ийиз кIанзава. И кардиз рехъ гана кIандач. Санкцияр ахьтин кIевибур авуна кIанда хьи, “Северный поток” тахьай мисал ийидайвал”. Аламат, са патахъай Россия агрессор, чпин душман я лугьуз малумарзава, муькуь патахъай Россиядин газ пулсуз кIанзава.
Мишела санкцияр артухардайди хиве кьазва. РагъакIидай пата ихьтин жуьредин къадагъаяр эцигиз саки цIувад йис я, амма абурувай Россиядин экономика пайгардикай хкудиз хьанач. Гена ада мягькем камаралди виликди еримишзава. Халкьдин дуланажагъ хъсан патахъ элкъвезва. Гьукуматди яшайишдин месэлаяр гьялзава. ТIугъвалдихъ галаз еримлудаказ женг чIугвазва ва гьакI яхцIурдав агакьна уьлквейризни и рекьяй куьмек гузва. РагъакIидай патан политикривай, “демократиядин” идеологривай гьа и крарни эхиз жезвач.
Чи халкьдихъ мад са хъсан мисал ава: “Сирке туьнт хьайи къапуниз зарар жеда”. США-дин ва Евросоюздин кьиле авайбуру, РагъакIидай патан са бязи уьлквейрин кьиле авай ксари (США-дин балабандал кьуьлзавай амадагри) чпиз жедай зияндикай фикирзавач. Россиядин вакцина кваз такьаз, Европадин халкьар рекьидай чкадал гъизва. Гьихьтин санкцияр абуру эцигайтIани, Россия абурун кIиринай фидач, я чи уьлкведи вичин дикъетлувални квадардач. Чаз писвал ийиз алахънавайбурув тайин жавабни ахгакьарда.
Нариман Ибрагьимов
