Алатай асирдин 1990-йисалай Россиядикай демократиядин уьлкве ийизвайди я лугьуз, чи халкьарин, инсанрин къанажагъдихъ, ахлакьдихъ, марифатдихъ галаз кьан тийизвай РагъакIидай патан, капитализмдин адетар тваз, жегьилрик виридалайни нагьакьан ерияр кутаз алахъна. Коммунистрин партиядихъ галаз санал пионеррин, комсомолрин тешкилатарни тергна. Чирвал, тербия гуз, советрин жемиятдин халис ватанперес, зегьметчи, намуслу инсан жез куьмекзавай метлеблу тешкилатрикай магьрум хьайи аялар, жегьилар чеб чпин ихтиярда гьатна, лап чIуру таблигъатдин таъсирдик акатна. Ихьтин татугай гьалари, гьелбетда, чIуру нетижайрални гъана. Чеб демократиядин шагьар-пачагьар я лугьузвайбуру къе Украина гьихьтин фура тунватIа чаз вилералди аквазва. Россиядизни гьахьтин инад кьаз кIанзавайди тир. Алакьнач.
Акьалтзавай несил тербияламишунин карда тади гьалда дегишвилер туна кIанзавай. Советрин Союздин хъсан чешнеяр уьмуьрдиз хкунин игьтияж авай. 2022-йисан 14-июлдиз Россиядин Президент Владимир Путина «Россиядин аялринни жегьилрин гьерекатдин гьакъиндай» закондал къул чIугуна. Адан теклифар, къейдер фикирда кьуна, Москвада уьлкведин аялринни жегьилрин 1 съездни кьиле тувана. Анал уьлкведин 89 региондин аялрини жегьилри чеб, Ватандиз вафалу веледар, яшайиш, экономика, культура, спорт вилик тухуниз, алай аямдин истемишунриз ва государстводин аслу туширвал, халкьарин садвал, азадвал, ихтиярар хуьз гьазур тирдакай малумарна. Тешкилатдиз «Сифтебурун гьерекат» тIварни гана.
Дагъустандани гьерекатдин региондин отделение кардик ква. Адан сифтегьан организацияр саки вири шегьерра, районра ачухнава. Гъилевай йисузни жегьилринни аялрин тешкилатар вузра, колледжра, школайра кардик кутазва. Апрелдин вацра гьа и месэладиз талукь мярекатар Дагъустандин технический университетда, майдиз Новолак районда, Махачкъалада жегьилрин крарин рекьяй министерстводин «Республикадин жегьилрин центрада» ва «Дагпатриот» центрада кьиле фена.
— Алай вахтунда вири уьлкведа Россиядин аялрин ва жегьилрин гьерекатдин сифтегьан оранизацияр ачухзава, — къейдзава РД-дин жегьилрин крарин рекьяй министр Камил Саидова. — Чунни ашкъидивди и гьерекатдик экечIнава. Къенлай кьулухъ аялринни жегьилрин иштираквал аваз тешкилзавай вири мярекатар «Сифтебурун гьерекат» тешкилатдин къаюмвилик кваз кьиле тухуда. Чи отделенида аялривайни жегьилривай 12 хиляй чпин алакьунар къалуриз, гегьеншариз, республикадиз, уьлкведиз чпелай алакьдай куьмек гуз жеда. Чахъ бажарагълу гзаф аяларни жегьилар, активистар ава.
1-2-июндиз Москвада «Сифтебурун гьерекат» тешкилатдин зурба фестиваль кьиле фена. Ана Дагъустандай 20 аялди ва жегьилди иштиракна.
«Сифтебурун гьерекатдик» «Юнармия», «Большая перемена» ва «Российское движение школьников» тешкилатарни акатзава. Адан девиз алай вахтунихъ галаз кьазвайди я. «Россиядихъ галаз хьун, инсан хьун, санал хьун, гьерекатда ва уьмуьрдани сад лагьайди хьун».
Абад Азадов
