1936-1937-йисар… Зи буба Гьасанов Теймуршагь Докъузпара райОНО-дин заведующий яз, чи хизан Усугъчайдал яшамиш жезвай. Зи 7 йис тиртIани, бубади зун районда кьиле физвай вири мярекатриз, партидин собранийризни тухудай.
Са юкъуз райкомдин идараяр авай куьче, ам Ахцегьиз физвай шегьре рехъни я, кьиляй-кьилди инсанрив ацIанвай. Абуру Ахцегьай халкьдин машгьур шаир СтIал Сулейман хтун вилив хуьзвай. Инсанар шаир мукьувай акунихъ тамарзу тир.
Са арадилай Сулейман авай М-1 маркадин машин пайда хьана, халкьдик юзун акатна. Вирида “Гьурра-а-а!” ванцелди, гъилер юзуриз, шаир къаршиламишзавай.
Зи буба, зунни галаз, машиндиз мукьва хьана. Ада шаирдивай жузунар авуна. Шаирди адаз вич Ахцегьрин жемятди хушвилелди кьабулайдакай, ахпа Хуьруьга шаир Тагьирахъ галаз гуьруьшмиш хьайидакай суьгьбетнай. Машиндин рулдихъ галайди шаирдин хва Мусаиб тир. Адал яргъи “мез” галай шапка алай. Абур, машиндай эвичI тавуна, рекье гьатнай, чпик тади квалдай. Гьа икI, шаир заз мукьувай Усугъчайдал акунай…
* * *
Хуьруьг Тагьирни заз мукьувай сад лагьай сеферда акурвал рикIел хквезва.
Са сеферда нянрихъ зунни тагьирхуьруьнви — кеменчи Агъамирзе, Дербентдай поездда аваз Тагьирхуьрел хъфиз, вокзалдик фенай. Ина шегьер галай пата айвандик Хуьруьг Тагьир ацукьнавай. Чун адаз мукьва хьана. Заз ам сифте тир аквазвайди. Агъамирзеди, ам акурла, адаз манияр лугьуз башламишна:
Вун акурла, чаз шад хьана,
Чи рикIериз багьа шаир.
Югъур хьуй ваз физвай сефер,
Чан эллериз багьа шаир!
Са шумуд куплет мадни авай. Хуьруьг Тагьирани адаз жавабар хганай. Аквадай гьаларай, абурун арада танишвал авай.
Агъамирзедин манидин ванцел вокзалдик квай инсанар, шаир Тагьир чир хьайила, тажуб хьана амукьнай. Гьа и арада Бакудихъай поезд атана. Зани Агъамирзеди шаирдив гвай кьве чемодан тухвана, абур купеда эцигнай. ЧIехи шаирдиз гъилер яна, чна ам вагондани акьадарнай….
Музафар Гьасанов,
дявединни зегьметдин ветеран, Бут-Къазмаяр
