Алатай гьафтедин киш юкъуз Мегьарамдхуьруьн районда, Дагъустандин Гьукуматдин Председателдин заместитель Владимир Лемешкодин иштираквални аваз, цIийиз эцигзавай аялрин бахчадин къандахдиз сад лагьай къван вегьиниз талукьарнавай мярекат кьиле фена.
“Лезги газетдиз” Мегьарамдхуьруьн райондин администрациядин пресс-къуллугъди хабар гайивал, мярекатда Россиядин оборонадин министерстводин застройщикдин Управленидин генеральный директор Мегьамед Хандаевани иштиракна.
Эцигунар кьиле физвай майдандал мугьманар райондин кьил Фарид Агьмедован тIварунихъай адан сад лагьай заместитель Гьабибуллагь Мурадалиева тебрикна. Ада аялрин бахчайра чкаяр бес тахьуниз, мектебар эцигуниз талукь месэлаяр гьялунин кардиз кьетIен фикир гунай райондин руководстводин патай республикадин Кьил Владимир Васильеваз чухсагъул лагьана.
В.Лемешкоди, Мегьарамдхуьруьн райондин агьалияр тебрикуналди, къейдна: “Алай йисуз Дагъустанда еке программа кьилиз акъудзава. Адан сергьятра аваз 9 мектебни аялрин 57 бахча эцигун фикирдиз къачунва. И макьсадриз такьатар федеральный бюджетдай чара авунва. Идалай гъейри, кьушунар авай чкайра ихтилат физвай программа кьилиз акъудун патал Россиядин оборонадин министерстводин къуватарни желбзава”.
И крар гъиле кьунвайбурун тIварцIихъ Мегьарамдхуьруьн райондин дишегьлийрин советдин председатель Тагуя Тагьировади муниципалитетдин дидейрин патай хуш келимаяр лагьана. Ада ва Владимир Лемешкоди, Мегьамед Хандаева гележегдин аялрин бахчадин къандахда сад лагьай къван шадвилин гьалара эцигна.
Дагъустандин вице-премьердин гафаралди, эцигунрин кIвалахар республикадин пудратчи карханади тамамарда. М.Хандаева алава хъувурвал, устIарар чпин везифайрив мукьвара эгечIда.
Мярекатдин эхирдай Владимир Лемешкоди Мегьарамдхуьруьн райондин кьил Фарид Агьмедова муниципалитетда яшайишдин сиясатдиз талукь месэлайриз кьетIен фикир гузвайдакай лагьана.
ЦIийи бахча эцигунилай гъейри, алай йисуз Уружба ва Самур хуьрера мектебарни эцигна акьалтIарда.
Чи мухбир
