“Сад тир Россия” фракцияди закондин проектдик 1999-йисуз боевикрин аксина женг чIугур Дагъустандай тир ополченцийрин женгинин гьерекатрин ветеранриз хьтин дережа (статус) гунин гьакъиндай кухтадай дегишвилер (поправка) гьазурнава. Фракциядин кьилин сад лагьай заместитель Андрей Исаева малумарайвал, и дегишвилери абуруз гьар вацра пул ва са жерге кьезилвилер гуда, гьа гьисабдай яз — ЖКХ-дин рекьяйни. Идан гьакъиндай ТАСС-ди хабар гузва.
“Сад лагьай сеферда кIелна, чна кьабулнавай законопроектди къалурзава хьи, и категория патал анжах материалринбур тушир ихтиярар тайинарнава. Фракциядин тIварунихъай и категория женгерин гьерекатрин иштиракчийрихъ галаз сад ийизвай дегишвилер гьазурнава ва теклифнава. Фикирзавайвал, и дегишвилери ветеранрин и категорийрин ихтиярар материальный жигьетдайни хуьда: абуруз гьар вацра пул ва яшайишдинни коммунальный майишатрай са жерге ва маса кьезилвилер гуда”, — хабар гана ада журналистриз ислен юкъуз президиумдин фракциядин заседанидин гьахъ-гьисабар кьадай вахтунда. А.Исаеван гафаралди, закондин проектдиз алай гьафтеда килигун планламишнава.
Госдумади 11-июлдиз депутат Умахан Умаханова туькIуьрнавай законопроект сад лагьай сеферда кIелна кьабулна. Документдал асаслу яз, “1999-йисан август ва сентябрь варцара Дагъустан Республикадин мулкарал террориствилиз акси серенжемар кьиле тухунин месэлаяр тамамарай ва Дагъустан Республикадин самооборонадин дестейрик кваз женгинин гьерекатра иштиракай ксар” женгерин гьерекатрин ветеранрихъ галаз барабар ийида.
Законопроектди и ксариз гьар йисан отпуск абуруз къулай вахтунда ишлемишдай мумкинвал гуда, багъманчивилин, бустанчивилин ва гражданрин коммерциядинбур тушир дачайрин кIватIалриз ва я яшайишдинни эцигунрин ва гаражрин кооперативриз гьахьдайла артуханвал жеда.
«Лезги газет»
