“Лезги газетдиз” Дагъустандин зегьметдин ва яшайишдин рекьяй вилик финин министерстводин пресс-къуллугъди хабар гайивал, милли “Демография” проектдин сергьятра аваз ведомстводи сад лагьай аял хьанвай ва я аял хвавиле, рушвиле кьабулнавай хизанриз яшайишдин рекьяй куьмек гун давамарзава. ТIвар кьунвай проектдин куьмекдалди винидихъ къейднавай жуьредик (категория) акатзавай хизанриз гьар вацра пулдин такьатар чара ийизва. И макьсадриз федеральный бюджетдай 2021-йисуз 3 838,9 млн манат пул ахъайнава. Адакай республикадин районрани шегьерра авай 44 852 хизандин арада 3 559,92 млн манат пайнава.
Лагьана кIанда, проектдин сергьятра аваз пулдин такьатар 2024-йисалди чара ийидайвал я. Государстводи гузвай пул къачун патал диде-бубайривай аял хьайидалай ва я хвавиле, рушвиле кьабулайдалай инихъ йисни зуран муьгьлетда арза вугуз жеда. Гьа са вахтунда арза сифтегьан 6 вацран къене вугайла, пул аял дидедиз хьайи вацралай гуда. Эгер арза зур йис алатайдалай кьулухъ вугайтIа, пул арза агакьай вацралай тайинарзава.
Чир хьун герек я, и пул са йисан къене гузва. Идалай кьулухъ диде-бубайри аялдин йисни зур тамам жедалди и пул къачун патал нубатдин сеферда арза кхьин хъувуна ва герек документар агакьарна кIанзава.
И месэладин жигьетдай алава суалар пайда хьайитIа, РД-дин зегьметдин ва яшайишдин рекьяй вилик финин министерстводин горячий линиядин телефондин нумрадиз (88-722-64-15-04) зенг авуна жузаз жеда.
«Лезги газет»
