“Образование” милли проект себеб яз, алай йисуз СтIал Сулейманан райондин 3 школада “Точка роста” центраяр ачухда. И мураддалди Цмуррин, ЦIийи поселокдин ва Кьасумхуьруьн 2-нумрадин юкьван школайра 25-августдалди махсус кIвалер тадаракламишда. Федеральный проектдин сергьятра аваз образованидин центраяр гужлу компьютерралди, 3D-принтерралди, квадрокоптерралди ва алай аямдин маса техникадалди таъминарда.
Рекъемрин техника факультативдин, гьакIни информатикадай, ОБЖ-дай ва технологиядай тарсар тухун патал фикирдиз къачунва. ОБЖ-дин тарсарив эгечIзавай гьални дибдай дегиш жеда. Алава яз, школьникриз медицинадин сифте куьмек гузни чирда.
* * *
2021-йисуз райондин 14 школа патал муниципалитетдин бюджетдин такьатрихъ алай аямдин техника маса къачунва. Интерактивный доскаяр Кьасумхуьруьн 1 ва 2-нумрайрин, Агъа СтIалрин, Кьулан СтIалрин, Курхуьруьн 1-нумрадин, Испикрин, КIахцугърин, Сардархуьруьн, НуьцIуьгърин, ДаркIуш-Къазмайрин ва Чуьхверхуьруьн юкьван школайрив, гьакIни Испикрин ва Асалдхуьруьн ООШ-рив агакьнава.
Эминхуьруьн юкьван школадин лингвистикадин кабинет патал багьа къимет авай тадаракар къачунва. Абур кIелунин цIийи йис башламишдалди эцигда.
* * *
Райондин кьил Нариман Абдулмуталибов, райондин депутатрин собранидин председатель Штибег Мегьамедханов ва райадминистрациядин векилар Сардархуьруьн юкьван школада “100 школа” проект уьмуьрдиз кечирмишзавай гьалдихъ галаз таниш хьана. Чими санузелар ва кIелунин корпусдихъ галай алава кIвалер дуьзмишун патал республикадин бюджетдай 2 миллион манатдин кьадарда аваз субсидия, гьакIни райондин бюджетдай 200 агъзур манат чара авуна. Карчи Сагьиб Алимовани вичин патай и проектдиз 500 агъзур манат гана.
Сардархуьруьн 1965-йисуз эцигай са мертебадин школадин дараматда алай вахтунда саки 80 аялди кIелзава. 2009-йисуз райондин бюджетдин такьатрин гьисабдай школадин къав дегишарнай. Ремонтрин кIвалахриз хуьруьнвийрини куьмекар ганай.
Ремонтрин кIвалахар хъсан ери аваз тамамарун ва кIелунин йис башламишдалди акьалтIарун лазим я.
Хазран Кьасумов
