Чи уьмуьрда важиблу кеспияр гзаф ава: алимвал, муаллимвал, духтурвал, агрономвал, инженервал, малдарвал… Амма гьакъикъатда вири терефар ахтармишна, абурукай виридалайни важиблуди гьим я лагьайтIа, — духтурвал.
Эхь, гьакъикъатдани, и лацу халатар алай, Гиппократан кьин кьунвай, юкъуз-йифиз рикIин секинвал авачир, герек чIавуз эверайла, йифизни месикай къарагъна, начагъдан гьарайдиз физвай инсанрал чIехи ихтибарвал авунва: абурун гъиле чилин винел виридалайни багьа хазина тир инсандин уьмуьр, адан кьисмет ава. СтIал Сулейманан райондин ЦРБ-дин чIехибурун ва аялрин хирург, хирургический отделенидин заведующий, РД-дин здравоохраненидин отличник, Дагъустандин лайихлу духтур, кьилин категориядин духтур Гьажимирзоев Ражидина 1990-йисан октябрдилай ина кIвалахиз хьайи девирда устадвилелди авур са шумуд четин операциядин гьакъиндай, гзафбуруз хьиз, зазни ван хьана.
— Жуван вилик акваз-акваз чан гузвай инсан ажалдин къармахрай акъудун патал вири фикир и кардиз гузвайла, адаз хьанвай хасаратвилин кьезилвал ва заланвал аквадач, — лугьузва Ражидин духтурди. — И чIавуз гьар са декьикьа важиблу я. Жуван гъиле инсандин кьисмет авайди фикирдай акъудна виже къведач.
Эхь, гьакъикъатдани, Ражидин духтур вичи хкягъай пешедай уьмуьрдин макьсад, руьгьдин таъминвал жагъанвай инсанрикай сад я.
1956-йисуз Сайтархуьре Гьажимирзоев Гьажимирзедин хизанда дедедиз хьана Гъетягърин юкьван школа акьалтIарай Ражидин Дагъустандин медицинадин институтдиз гьахьна. Анаг куьтягьайла, ам кIвалахиз Тажикистан ССР-дин Орджоникидзеабад шегьердиз рекье туна. Ина жегьил пешекарди медучилищеда тарсар гуз хьана. Гуьгъуьнлай Ражидин духтурди Нуьрек шегьерда больницада хирург-ординатор, ахпа хирургический отделенидин заведующий яз кIвалахна. Вири и йисара, жегьил пешекар яз, ада са шумуд четин операциярни авуна. Гьа са вахтунда хирургвилин устадвал хкажунал, кIвенкIвечи хирургрин тежриба чирунал ара датIана кIвалахна ва исятдани кIвалахзава.
1988-йисуз ам Тажикистандин госмединститутдин ординатурадиз гьахьна ва ам лап хъсан къиметралди акьалтIарна. КIвалахай гьар са чкада пешедал рикI, кардин гъавурда хьуналди, начагъбурухъ галаз дуьз рафтарвал авуналди Р.Гьажимирзоева тажик халкьдин патай еке гьуьрмет ва авторитет къазанмишна.
Адаз намуслу зегьметдай Тажикистан ССР-дин гьукуматдин Гьуьрметдин грамотани ганай.
Амма рикIе жуван хайи халкьдиз къуллугъ авунин мурад авай Ражидин духтур вичин хайи ватандиз хтана.
Вичихъ галаз авур суьгьбетдин вахтунда Ражидин духтурди къейд авурвал, а чIаван ДАССР-дин здравоохраненидин министерствода, МВД-дин санчастуна кIвалах авурдалай гуьгъуьниз ам хайи райондиз хтана.
— Махачкъалада захъ кIвалахдин, гьамни илимдин рекьяй виниз тир дережаяр къазанмишдай, фадлай рикIевай мурадар кьилиз акъуддай мумкинвал жезвайтIани, — лугьузва Р. Гьажимирзоева, — зун Кьасумхуьрел хтунал кIусни пашман хьанач. Гьар са кас сифте нубатда жуван хайи халкьдин къуллугъда акъвазна кIанда. Жуван къуватар, чирвилер масанра серф авуна, са куьнизни бакара амачирла, хайи чилихъ, ватандихъ ялунни са кьегьалвал туш.
РикI, гъил михьи духтур, хуш къилихрин инсан яз, ада районэгьлийрин, гьакI маса районрин агьалийрин патайни гьуьрмет къазанмишнава. Хирург яз, Р.Гьажимирзоева (гъвечIи операцияр квачиз), гьар йисуз 150-далай виниз операцияр, гьа са вахтунда аялрин духтурвални ийизва. Адан кIвалахдилай ЦРБ-дин руководстводи, хирургический отделенидин работникри ва начагъбуруни екез разивалзава.
Дамах гвачир, пешекарвилин устадвал ара датIана хкажунал машгъул тир Ражидин Гьажимирзоевича вичелай гзаф тежриба авай духтуррал меслят гъида, герек чIавуз гафуналдини, кардалдини вични абурун куьмекдиз фида. Ам инин медперсоналдиз неинки вичин инсанвилин, агъайнавилин лишанралди, гьакI герек чкадал вичин гаф хуьналдини хуш я. Адан сивяй векъи гафунин ван я кIвале, я кIвалахал къведач.
Ражидин Гьажимирзоевичан уьмуьрдин юлдаш Жамиляни чи райондилай къецени гзафбуруз машгьур, хуш къилихрин дишегьли, савадлу пешекар-духтур я. Ада чи районда авай ВТЭК-дин кIвалахдиз гзаф йисара регьбервал гана, алай вахтундани гьана зегьмет чIугвазва.
Абуру чпин веледрикайни хайи халкьдиз ва Ватандиз вафалу инсанар хкатун патал чалишмишвалзава. Абурун аяларни диде-бубади хкягъай рекьяй фена. Алай вахтунда и хизанда 5 духтур ава.
РД-дин лайихлу духтур Ражидин Гьажимирзоевича и йикъара вичин уьмуьрдин 65-гатфар шад гьалара къаршиламишна. И лишанлу вакъиа рикIин сидкьидай тебрик авунихъ галаз санал чаз яр-дуст кIани, гьамиша сивел зарафат-хъвер алай адахъ сагъ чан, яргъал уьмуьр, руьгьдин кIубанвал, хизандани бахт-берекат хьана кIанзава.
Абидин Камилов,
РД-дин культурадин лайихлу работник,
РФ-дин журналистрин Союздин член
