Мергьяматлувилин “Леки” фондуни кьилел диде-буба аламачир, гьакIни тамамбур тушир ва дарда аваз яшамиш жезвай хизанрай тир аялриз школада алукIдай пек-партал ва кIелунра лазим къвезвай амай шейэр гуниз талукьарнавай серенжем кьиле тухвана.
Сир туш, аялди хъсан чирвилер къачун ва адахъ экуь гележег хьун патал диде-бубади аялриз талукь шартIарни тешкилун лазим я. И кар фикирда кьуна “Леки” фондуни Сулейман-Стальский районда мергьяматлувилин серенжем тешкилна…
Вири девирра кьилел диде-буба аламачиз амукьай аялар иллаки обществодин куьмекдихъ муьгьтеж жезва. Гьавиляй школа патал лазим къвезвай шейэр сифте нубатда етимриз, тамамбур тушир хизанрай тир ва четин шартIара яшамиш жезвай аялриз гана. Вири санлай 140 аял школада алукIдай пек-партал, рюкзак, пенал, дафтарар ва герек маса шейэр гуналди шадарна.
Кесибвиле авай ксариз куьмек гун лап дегь заманайрилай инихъ дагъвийрин ивидик квай хъсан адет я. Къенин юкъузни мергьяматлувилин серенжемар кьилиз акъудзавай ксар тIимил гьалтзавач. “Леки” фондуни чпихъ галаз санал мергьяматлувилел машгъул жезвай гьар садаз уьмуьрдин четин шартIара яшамиш жезвай ксариз куьмек гунай чухсагъул малумарзава. И серенжем уьмуьрдиз кечирмишиз куьмек гайи ксарикай садни карчи ва общественный деятель Сагьраб Ширинов я. Ада вичин патай 50 аялдиз портфелар ва лазим маса шейэр чара авуна. “Лекидин” фондунай и серенжем кьиле тухун патал 120 000 манат харжна.
И серенжемдин сергьятра аваз Хасавюрт райондин Къурушрин хуьрени 10 аялдиз портфелар ва чирвилер къачун патал лазим къвезвай амай затIар гана.
Гьайиф хьи, са акьван еке мумкинвилер авачирвиляй Сулейман-Стальский райондин 40 хуьруькай анжах 21 хуьре и серенжем кьиле тухуз алакьна. Гележегда “Лекидин” планрик амай хуьрерин аялризни куьмек гун ква. Чна умудзава, и кардик чи амай ватандашрини лайихлу пай кутада.
“Леки” фондуни Сулейман-Стальский райондин кьиле авай ксариз, умуми образованидин идарайрин директорризни къуллугъчийриз четин шартIара яшамиш жезвай аялар тайинардай сиягьар гьазурунин карда куьмек гунай чухсагъул малумарзава.
“Леки” фондунин сайтдай.
