Эхиримжи йисара Дагъустан Республикада образованидин идараяр цIийикIа туькIуьр хъувуниз кьетIен фикир гузва. Дагъустандин регьбер Владимир Васильева кьил кутуналди шаз “100 школа”, цIи “150 школа” махсус проектар кьилиз акъудзава. Разивилелди къейд ийин, гъилевай йисуз и проектда Ахцегь райондин 5 школади иштиракзава.
И мукьвара чун и важиблу проектда иштиракзавай Ахцегьрин 2-нумрадин школадиз фена ва ина ремонтдин кIвалахар кьиле тухузвай гьалдин патахъай чна адан директор Гьейдар Эльдаровахъ галаз суьгьбетна.
— Чи школа республикадин и проектдик акатуникди чи бахтуни гъана, — разивилелди лугьузва ада. — Вахтунда документар вугана, конкурсда гъалибвал къачурла, чун спонсорар жагъурунив эгечIна. Кьилин спонсор районэгьлийрин патай РД-дин Халкьдин Собранидин депутат, 2-нумрадин школадин виликан ученик Рафик Асланбеговакай хьана. Пул бес тежез акурла, кьвед лагьай спонсорвал за ийизва. И проект кьилиз акъудун патал Гьукуматдин ва спонсоррин куьмекни галаз саки 3 миллион манат пул кIанзава. Алай вахтунда чи вилик школадин дараматдин къав дегишарунин, гьаят аваданламишунин, чими туалетар эцигунин везифа ква.
- И кIвалахар 1-сентябрдалди бегьемариз жедани?
— Дугъри я, тешкиллувилин себебар аваз (тендер, пудратчи дегиш хьунихъ галаз алакъалу яз) ремонтрин кIвалахар энгел хьанва. Амма чна агакьар хъийида. Школада ЕГЭ-дин имтигьанар аваз хьуникди, классрин адетдин куьлуь-шуьлуь ремонтривни чун геж эгечIна, ятIани исятда абур саки бегьем я. Алай вахтунда эцигунрин вири материалар чкадал ала ва устIарри гьакъисагъвилелди кIвалахзава. Аллагьди гайитIа, 25-августдалди гъилевай вири кIвалахар куьтягьна, кIелунин цIийи йисаз чун тамамвилелди гьазур жеда. 1-сентябрдиз чна аялар цIийи хъувунвай школадиз кьабулда.
- Куь школада аялриз дерин чирвилер гудай махсус Центр ачухзава. Им вуч Центр я?
— Эхь. Хуьруьн школайра аялриз девирдин истемишунрив кьур шартIар яратмишун ва абуруз дурумлу чирвилер къачудай мумкинвилер таъминарун патал “Точка роста” тIвар алаз федеральный махсус программа кардик ква. Ана иштиракун патал чнани документар вугана ва адак акатна. И программадай чи 2-класс 1 миллионни 700 агъзур манатдин къимет авай кIелунин махсус техникадалди тадаракламишдайвал я. Гьелелиг и классар лазим тирвал ремонтун патал райадминистрациядин бюджетдай 327 агъзур манат пул чара авуна, ремонтзава. Москвадай герек техникани гваз къведай комиссиядини пешекарри чи классар тадаракламишда. И программадай чи 6 муаллим пешекарвилин дережа хкаждай курсариз ракъурнава. Маса тарсарилай алава, а программадай гила чна аялриз шахматрай, робототехникадин, информатикадин ва бязи маса хилерайни кружокар тухуда. И программадай чавай истемишзавай ва чалай аслу тир кьван вири крар авунва. Гьукуматдин программайра иштиракуниз за чи амай школайрин директорризни эверзава.
Алина Шерифалиева
