И мукьвара школаяр цIийи кIелунин йисаз гьазур жезвай гьал ахтармишунин мураддалди РД-дин госзакупкайрай комитетдин председателдин везифаяр тамамарзавай Жафар Гьажибегов Докъузпара районда кIвалахдин рекьяй мугьманвиле хьана. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
Ахтармишунар кьиле тухузвай вахтунда адахъ “Докъузпара район” МР-дин кьилин везифаяр вахтуналди тамамарзавай Агьмед Агьмедов, райондин кьилин заместителдин везифаяр вахтуналди тамамарзавай Салигь Гьажимурадов, Россиядин МЧС-дин ОНД-дин ва РД-да авай ГУ-дин ПР-дин векилар, “Докъузпара район” МР-дин ГОЧС-дин ва ЕДДС-дин крарай управление” МКУ-дин начальник Ренат Агъаметов галай.
Ахтармишунар кьиле тухузвай вахтунда райондин школайрин дараматар авай гьал, классар комплектламишун, образованидин объектар террориствиликай ва цIаяр кьуникай хуьзвай гьал, пищеблокар, столовояр, кIвалахдин тадаракар авай гьал ахтармишна.
Алай йисуз райондин умуми образованидин вири идарайра кIелунин цIийи йисаз гьазур хьунин серенжемар финансринни майишатдин кIвалахдин пландал асаслу яз кьиле тухузва ва 20-августдалди акьалтIарда.
И карда са жерге серенжемар тамамаруниз иллаки гзаф фикир гана кIанзава. Мисал яз, кьетIен гьалар арадал атайла хатасузвал таъминарун, санитариядин къайдайрал, криминалдин жуьредин ва террориствилин къурхулувилерикай хуьнин истемишунрал амал авун, капитальный ва маса ремонтар, майишатдин кIвалахар тамамарун.
Ахтармишунрин нетижайрал асаслу яз райондин умуми образованидин школаяр гьазур хьанвай гьал рази жедайди яз гьисабна.
«Лезги газет»
