1-апрелдилай Россиядин армиядиз жегьилриз гатфарин эверунив гатIунда ва 15-июлдалди давам жеда. Россиядин оборонадин министерстводин алакъадин къуллугъди малумарнавайвал, гатфарихъ уьлкведин армиядиз эвердайбурун кьадар, алатай йисан рекъемрив гекъигайла, хейлин артух жеда.

Гьар са диде-бубадиз чир хьун лазим я, армиядиз 18 йисалай 27 йисалди яшда авай жегьилриз эвер гузва. Вири мажбуридаказ медицинадин комиссиядай ахъаюн герек я.

Им лап кар алай месэла я. ГьикI ла­гьайтIа, начагъвал квай са касни армиядин жергейриз тухузвайди туш. Абурук рикIин азарар квайбур, давление 150/ 90 авайбур, катарактадик, глаукомадик вилерин ишигъ зайифбур, бишибур, отит, панкреатит, чахутка, гепатит, ВИЧ квайбур, ру­фун аватнавайбур, ратар хирери (яз­ва) кьунвайбур, ракдин, психика­дин азарар, геморрой авайбур, кьве дережадилай виниз куькбур, писдиз чIалар галкIизвайбур акатзава.

2022-йисан декабрдиз Россиядин оборонадин министр Сергей Шойгуди армиядиз эвер гузвайбурун яшар гзафардайдакай лагьанай. Гила хьиз, 18 йис хьайила ваъ, 21 йисалай 30 йис тамам жедалди яшара авай  жегьилриз эверда. Уьлкведин Президентдин пресс-секретарь Дмитрий Пескова баян гайивал, Владимир Путина Сергей Шойгудин тереф хуьзва.

Диде-бубайриз чир хьана кIан­завай месэлаяр мад ава. Украинада кьиле тухузвай махсус военный серенжемдикай къурху аваз, бязи ди­де-бубайри 2022-йисан зулун призывдиз чпин яш тамам хьанвай рухваяр масанриз ракъурна. Им закондихъ галаз кьазвай кар туш. Жавабдарвилизни чIугун мумкин я. Государстводихъ жегьилар вахтуналди армиядиз тухун тийидай (отсрочка) закон ава. Адал асаслу яз, кIвалахни авуна кIанда.

Закондин бинедаллаз муьгьлет (отсрочка) вузрин студентриз, аспирантриз (очнидаказ кIелзавай), лазим тир аккредитация авай компанийрин къуллугъчийриз, кьве йис ва адалай виниз яш тамам тахьанвай аялар авай бубайриз, набут аял (пуд йис жедалди) авайбуруз, аял кьилди хуьзвайбуруз, уьмуьрдин юлдаш кIвачел заланзаваз хьайи­тIа, гьалдай фенвай мукьва-кьилийрихъ гелкъвезвайбуруз, кьуьзуь диде-бубайриз къаюмвал ийизвайбуруз. Аквазва хьи, законар авазва, абурукай гъавурда аваз менфят къачуна кIанда.

Гьар са диде-бубадиз чир хьун лазим я: армиядин жергейриз эверзавай садни военный махсус се­ренжемдиз ракъурзавач. Абуру чеб аватай частара къуллугъда, вахт куьтягь хьайила, кIвалериз хкведа. Къуллугъ давамариз кIанзавайбуру контракт кутIунда.

Нариман Ибрагьимов