Шикилдай аквазвайди тIебиатди арадал гъанвай зурба имарат я. Тажуб жедай делил ам я хьи, “ШейтIандин минара” тIвар акьалтнавай и гъвечIи дагъ дуьзенлух чкадал ала, адан къваларив са гьихьтин ятIани дагълар, тепеяр гвач. Ам вичин кIалубдин, яни туькIуьр хьунин жигьетдайни фикир желбдайди я.
Ам США-дин Вайоминг штатдин мулкара авай Белл-Фурш вацIун дереда ава. “Девилс-Тауэр” — им адан ингилис тIвар я. США-да ам “милли монумент” яз гьисабзавай сад лагьай объект я.
Ам арадал атуникай гьеле тамам делилар малум туш. Википедиядин энциклопедияда къейднавайвал, 265 метрдин кьакьанвал авай “ШейтIандин минара” Чилин деринрай цIранвай магма винел акъатуникди, вулкандин жуьреда арадал атана. Винел акъатайла, ругуд мурз алай жуьреда тикдиз акъвазна, кIеви хьана. Санлай адан майдан 5,45 квадратдин километрдикай ибарат я. Ам гьуьлуьн дережадилай 1558 метрдин кьакьанда ава.
Дагъдал “ШейтIандин минара” тIвар акьалтунихъни вичин себеб авачиз туш. А мулкара яшамиш хьайи къадим девиррин тайифайри ихьтин затI анжах шейтIанди арадал гъун мумкин яз гьисабзавай.
«Лезги газет»
