РФ-дин Федерациядин Советдин сенатор, машгьур меценат Сулейман Керимова шейх Ярагъ Мегьамедахъ галаз алакъалу тарихдин чкаяр цIийикIа туькIуьр хъийидайвал я. Идахъ галаз сад хьиз, адаз туристар патал Дагъустанда Ярагъидин уьмуьрдиз, ирсиниз талукьарнавай кьилдин маршрутни арадал гъиз кIанзава. Идакай Дагъустандин Государстводин секретарь Хизри Абакарова хабар гана.
Ярагъ Мегьамедахъ галаз алакъалу зияратар авай гьалдихъ галаз таниш хьун патал Хизри Абакаров, архитекторар ва маса пешекарарни галаз Мегьарамдхуьруьн, Сулейман-Стальский, Кьурагь ва Гуниб районриз фена. Къейд ийин хьи, Вини Ярагъдал Кавказдин имамрин муаллимдин мискIиндин (ина виликдай гьакIни медресани кардик квай) са пай чкIанвай дарамат ама. ЦIийикIа туьхкIуьр хъувунин кIвалахарни сифте нубатда гьа и мискIиндилай гатIунда.
“Сулейман Керимова Дагъустанда авай Ярагъ Мегьамедан вири зияратар авадан хъийида. Туристар патал арадал гъидай цIийи маршрутди лагьайтIа, къецепатай чи республикадиз мугьман жезвайбуруз шейхдин ирсинихъ галаз мукьувай таниш жедай, Дагъларин уьлкведин иер пипIериз килигдай мумкинвал гуда.
Заз, сифте нубатда, Сулейман Керимоваз ва зияратар цIийикIа туьхкIуьрдай вири пешекарриз сагърай лугьуз кIанзава. Къуй Сулейманан мергьяматлу крарилай Аллагь рази хьурай”, — кхьенва Хизри Абакарова “Instagram”-да авай вичин аккаунтда.
Агьмед Магьмудов
