Гъалибвилин Йикъан вилик Дагъустан Республикадин Кьилин везифаяр вахтуналди тамамарзавай Сергей Меликова военный парад тешкилунин месэладиз талукь совещание кьиле тухвана. Идан гьакъиндай “Лезги газетдин” редакциядиз РД-дин Кьилин пресс-къуллугъди хабар гана.
Суваррин йикъара талукь идарайри, къуллугъри кIвалахдай гьалдикай Дагъустан Республикадин Гьукуматдин Председатель Абдулпатагь Амирханова суьгьбетна. Алай вахтунда республикада авай жемиятдинни сиясатдин гьалдикай РД-дин Кьилин ва Гьукуматдин Администрациядин руководитель Алексей Гьасанова малумат гана. РД-дин Гьукуматдин Председателдин заместитель Анатолий Къарибова рапар язавай вахтунда республикада арадал атанвай санитариядинни эпидемиологиядин гьалдиз къимет гана.
ЧIехи Гъалибвилин Йикъаз гьазурвал акунин гьакъиндай РД-дин Гьукуматдин Председателдин заместитель Муслим Телякавова гегьеншдиз ихтилатна. Ада къейд авурвал, регионда ватанпересвилин “РикIел хуьнин вахта”, “Гъалибвилин диктант”, “Георгиян лент”, “ЧIехи перемена”, “Ветерандин кIвалин вилик парад тухун”, “Гъалибвилин кагъаз”, “Гъалибвилин дакIарар”, “Фронтдин бригадаяр” акцияр, мярекатар кьиле тухун давамарзава. “Рекьин тийидай полк” гьерекат 24-июндиз тухудайвал я.
Гъалибвилин суваррин кар алай вакъиаяр 9-Майдиз Каспийск шегьерда кьиле фида. Военный парадда Каспийскдин флотилиядин ва маса частарин са агъзурдалай гзаф аскерри ва вишев агакьна военный техкникади иштиракда.
М.Телякавова алава хъувурвал, республикада амай дяведин ветеранрив Россиядин Федерациядин Президент В.Путинан тебрикдин чарар ва пулдин такьатар агакьарда.
Рахай юлдашрихъ яб акалайдалай гуьгъуьниз Сергей Меликова совещанида авай руководителриз суварриз талукь яз тухузвай вири мярекатра иштиракуниз эверна. “Чун дяведин ветеранрив еке къайгъударвилелди эгечIун лазим я. Абур чи республикада анжах 48 кас ама. Абурун яшайишдиз чна датIана фикир гун лазим я”, — лагьана региондин руководителди.
Каспийск шегьерда военный парад тешкилунин ва тухунин гьакъиндай малумат Каспийскдин флотилиядин командующийдин заместитель, контр-адмирал Николай Якубовскийди гана.
«Лезги газет»
