Росрыболовстводин Кеферпатан Кавказда авай Управленидин пресс-къуллугъди хабар гузвайвал, Дагъустанда алай йисан кьуд вацран къене 5 агъзур тонндилай виниз балугъар кьунва. РикIел хкин, 2019-йисан сифтегьан кьуд вацра республикада кьур балугърин кьадар 983 тонндив агакьнавай.

Ихьтин нетижаяр арадал атун Дагъларин уьлкведа кIезрийрин ветегайрин (килечный промысел) кIвалах вилик финихъ галаз алакъалу ийизва. Мисал яз, эгер алатай йисан 1-кварталда 237 тонн кIезрияр кьунвайтIа, 2020-йисан гьа и девирда кIезрияр 4,5 агъзур тонн кьван кьунва.

Къейд ийин хьи, кьазвай балугърин кьадар артух хьанватIани, суьрсет маса гунин гьалар са акьван тарифдайбур туш. Балугъчийрин фикирдалди, и кар коронавирусдихъ галаз алакъалу я.

Алава: балугъчивилин хиле тайинарнавай къайдайрал асаслу яз, алай йисан 15-апрелдилай 15-июндалди  Дагъустандин, Кабардино-Балкариядин, Кеферпатан Осетия-Аланиядин, Чечнядин ва Ингушетиядин мулкарал балугъар кьун вахтуналди къадагъа авунва.

«Лезги газет»