ЦIинин йисузни коронавирусдин тIугъвалди къагьриманвилин “Шарвили” эпосдин сувар ге­гьеншдиз тухудай мумкинвал ганач. Дагъустандин сергьятра анжах СтIал Сулейманан районда тешкилна.

Краснодардин крайда ва Рос­товда авай чи диаспорайрин векилри “Лезги газетдиз” хабар гайивал, 27-июндиз — Краснодардин крайда, 4-июлдиз Ростовда чи ватанэгьлийри Шарвилидин сувар шад гьалара къейдна.

Лезгийрин жемиятдин деятель Ариф Меликова къейд авурвал, Краснодарда кьиле фейи суварик Ростовдай, Ставрополдай атанвай мугьманрини иш­тиракна. Ростовда тешкилайла, чпин нубатда Ставрополда, Краснодарда авай ватанэгьлийрини милли суварин мярекатрик чпин къуьн кутуна.

— Краснодардин крайда эпосдин сувар кьиле тухунин фикир шаз чи ватанперес Имран Атлуханован кьилиз атанай, — лагьана А.Меликова. — “Шарвили” суварин сергьятра аваз гьам Краснодарда, гьам Ростовдани цIил ялунай, путар хкажунай акъажунарни кьиле тухвана. Спортдин милли жуьрейра гъалиб хьайибуруз кубокар, грамотаяр ва махсус пишкешар гана. Симинин пагь­ливан­ри­ни чпин алакьунар къалурна. Манийрин, кьуьлерин, игитвилин эпосдиз талукь шииррин шад мярекатар гурлудаказ кьи­ле фе­на. Суварин сергьятра аваз милли тIуьнарни гьазурнавай.

Шарвилидин суварихъ жуьреба-жуьре шегьер­ра яшамиш жезвай ватан­эгьлияр агудунин, умуми къуватралди милли меденият, халкьдин адетар хуьнин жигьетдайни еке метлеб ава.

Лезги  Фетгьуьллагь