Алай йисан 21-февраль зун патал кьетIен югъ хьана. Виридуьньядин дидед чIаларин юкъуз Сулейман-Стальский райондин центр Кьасумхуьрел лезги чIалаз талукьарна кьиле фейи конференциядал заз алай аямдин лезги эдебиятдинни медениятдин экуь гъетерикай сад тир Керимова Седакъет Къайинбеговнадихъ галаз таниш жедай мумкинвал хьана.
Сифте нубатда заз и районда ихьтин чIехи мярекат тешкилунай ва иниз Кьулан вацIун а пата авай лезги халкьдин векилриз теклиф авунай райондин кьил Нариман Абдулмуталибоваз, вири тешкилатчийриз сагърай лугьуз кIанзава.
Сад лагьай сеферда Седакъет Къайинбеговна заз чи факультетдиз мугьман хьайила акурди я. ЧIалан устаддин яратмишунрихъ галаз зун фадлай таниш я ва абур заз лап рикIивай хуш я. Гьеле мектебда амай йисара за абур рикI алаз кIелдай, хуралай чирдай.
Алай йисуз, гележегда илимдин кIвалах кхьидай мурад рикIе аваз, зун адан шииратдин сирерай кьил акъудиз эгечIна. Дугъриданни, Седакъет Къайинбеговна аламатдин бажарагъ авай, Аллагьдин патай пай ганвай инсан я. Ам неинки са шаир хьиз, гьакI инсан хьизни вири патарихъай хъсан къилихар авай кас тирди гьасятда малум жезва. Зун адан руьгьдин кьакьанвили, жумартвили кьадарсуз гьейранарна. “Пис къилихар авай шаирдин къеняй хъсан шиирар бажагьат акъатда”, – лагьанай чаз садра тарсуна гьуьрметлу муаллим Гьажи Гьуьсейновича. Къе за и гафар, рикIе чими гьиссер аваз, Седакъет Керимовадин гьакъиндай лугьузва.
Шаирди вичин патай савкьат яз заз са кьадар ктабар багъишна. Лезги халкьдихъ икьван рикI кузвай гафунин магьир устад Седакъет Къайинбеговнадиз за рикIин сидкьидай сагърай лугьузва. Къуй адан бажарагъ авайдалайни мягькем хьурай, лезги эдебиятдин хазина адан куьмекдалди мадни гуьрчег жавагьиррив ацIурай! Къуй чи халкьдихъ ихьтин шаирар гзаф хьурай!
Амина Шагьпазова,
ДГУ-дин магистрант
