11-ноябрдиз Кьурагь райондин Бугъдатепе хуьре (ЦIийи Кьуьчхуьра) Дагъустандин ва лезги литературадин классик, чIехи “бунтчи” шаир Кьуьчхуьр Саидан 250 йисан юбилейдиз талукьарнавай шадвилин мярекат-шиирринни манийрин, кьуьлеринни сегьнейрин сувар кьиле фена.
Йисан сифтедилай чна и югъ вилив хуьзвай, юбилярдиз талукь метлеблу хейлин материаларни (макъалаяр, шиирар, гьикаятдин эсерар, “Гьай тахьай гьарай” романдай кIусар ва мсб) чи газетдин чинра чапна. Куьрелди, халкь и вакъиадикай хъсандиз хабардар авунвай. Чун рахазвай мярекатдини и кар субутна. Шаирдин ирсиниз гьуьрметзавай, адал ашукь векилар — тамам дестеяр Кьиблепатан Дагъустандин саки вири хуьрерай, Махачкъала, Каспийск,Дагъустандин Огни, Дербент шегьеррай, Белиждай, гьа жергедай, яз лап гзаф аяларни жегьилар, яратмишдай интеллигенциядин векилар-шаирар, журналистар, манидарар, муаллимарни культработникар атанвай, абуру мярекат гурлуни авуна. Авайвал лугьун, и карди чун лап рикIивай шадарна. ГьикI хьи, шаир хана 250 йис алатайлани, адан тIварцIиз ва ирсиниз икрамзавайбур къвердавай гзаф жезва. Чебни-жегьилрин арада! Им я хайи лезги чIал ва адал теснифнавай ирс садрани квахь тавунин асул шагьидвал!
Мад са кар къейд тавуна жедач: чи халкьдин арада Эмин тIвар алайбур къвердавай артух жезвайди хьиз, Саидарни гзаф жезва! И мярекатдални са шумуд Саида чеб чIехи шаирдин ирсиниз вафалу невеяр тирди къалурна.
Кьуьчхуьрви шаир ва сегьнедин билбил хьайи Айдунбег Камилован хва Саид, хуьруьгви жегьил шаир ва таржумачи Мурад-Саид (ада Кьуьчхуьр Саидан эсерар урус чIалаз элкъуьрна, кьилдин ктаб акъуднава ва и мярекатдин иштиракчийриз багъишна), Моллакентдай атанвай шаир Ибрагьимов Саид, кьуьчхуьрви шаир Фазил Асланован хтул Саид ва масабур акурла, рикIик дамахдин гьиссер чеб-чпелай акатзавай…
Пакамалай далдам-зуьрнедалди къаршиламишай сувар ачух хьана.
Юбилярдикай кьилин доклад школадин муаллим Муслимуллагь Мурадова авуна.
Мярекатдин иштиракчияр, ам тешкилайбур тебрикиз Кьурагь райондин администрациядай анин кьилин заместитель Махач Хариев, райондин агъасакъалрин Советдин председатель Фахрудин Мирзоев, райондин прокурор Фируза Лагметова, образованидин управленидин начальник Рамазан Катибов, Сулейман-Стальский райондин Герейханован хуьруьн библиотекадин заведующий, кьуьчхуьрви руш Эльза Рустамова, Кьурагьрин школадин дидед чIалан муаллим Тамара Мусаева, Кьуьчхуьррин школадин виликан директор Хидир Рамазанов, Кьасумхуьруьн музшколадин директор, кьуьчхуьрви хва Къазибег Къурбанов, Каспийскдай хтанвай гьуьрметлу кьуьчхуьрви, лайихлу муаллим-ветеран Улушан Муталибов, Белиждай хтанвай мугьман Тагьир Тагьиров, ДаркIушрин школадин муаллим, кьуьчхуьрви руш Ифриз, Кумухрин хуьруьн администрациядин кьил Руслан Улубегов ва масабур рахана.
Мярекат иниз хтанвай са жерге шаирри чпин бажарагъдалди гурлу авуна. Саидаз бахшнавай чIалар кIелдай ва чпин рикIевай чими келимаяр кьуьчхуьрвийриз ва мугьманриз лугьудай мумкинвал инал СтIалдилай атанвай шаир Сажидиназ, Махачкъаладай хтанвай Фейзудин Нагъиеваз, кьуьчхуьрви шаир, и мярекатдин тешкилатчийрикай сад тир Фазил Аслановаз, Филерин хуьряй атанвай муаллим ва шаир Айна Шалбузовадиз, шаир ва мухбир, ЦIийи Макьарин векил Шагьабудин Шабатоваз, Белиждин гимназиядин, РД-дин лайихлу муаллим ва шаир Гъулангерек Ибрагьимовадиз, Ашарин хуьряй атанвай шаир, композитор ва муаллим Гьуьсейн Рамазановаз, “Куьредин хабарар” газетдин редактордин заместитель, шаир Абидин Камиловаз гана.
Мярекатдин иштиракчияр ашукьар тир Алихана (Авадандай атанвай), Миграгъви Каира (вичин диде Фаридани галаз атанвай) чпин гьевеслу манийралди, гьавайралди шадарна. И чIавуз кьуьчхуьрви аялри ва жаванри майдандал вирида санал кьуьлерзавай, чпин разивал ва устадвал къалурзавай.
Хуьруьн ва райондин культурадин кIвалерин гьевескарри музыкадин чIехи программа гьазурнавай, гьар са рахун ва азад декьикьаяр абуру милли музыкадин авазралди, манийралди метлеблу ва таъсирлу ийизвай.
Кьурагьай атанвай ва чкадин школадин аялри чIехи гьевесдивди ва устадвилелди Кьуьчхуьр Саида ва маса шаирри ашукьдиз бахшна кхьенвай эсерар кIелна. Суварин иштиракчийри гьар са нумра гурлу капаралди къаршиламишна.
“Лезги газетдин” редакциядин тIварунихъай газетдин литературадин отделдин редактор Мердали Жалилов рахана. Ада Кьуьчхуьр Саидан ирс кIелзавайбуруз мукьва авун патал гъилевай йисуз редакцияди авур ва гилани давамарзавай кIвалахдикай суьгьбетна. Лезги ва Дагъустандин литературайрин классик Кьуьчхуьр Саидан дережадин шаирар а чIавуз (XVIII, XIX асирар) маса халкьарихъ хьанатIа гьелелиг тайинариз тахьанвайди, Саид гьакъикъатдани а чIаван “мичIи цава куькIуьн хьайи сифтегьан нурлу гъед” тирди, адан экуьни вичин вахтунда ва гуьгъуьнлайни гзаф шаирар (Етим Эмин, СтIал Сулейман, Хуьруьг Тагьир, Хпеж Къурбан, Къияс Межидов ва масабур) уяхарайди, абуруз майдандиз экъечIиз куьмек гайиди, гилан аямдани адан къуват зайиф тахьанвайди къейдна.
Мярекатдин мугьман, “Лезги газетдин” политикадин отделдин редактор, писатель Нариман Ибрагьимова Кьуьчхуьр Саидан ирсинин сагьибриз вичин эхиримжи ктабрикай ва вичи кIватI хъувуна чапдай акъуднавай чIехи шаирдин ктабар багъишна.
Мярекат сифтедилай эхирдалди хуьруьн школадин муаллим Карина Ляметовади кьиле тухвана, и жигьетдай ада вични чIехи шаирдин ирссагьибрикай сад тирди субутна. Хуьруьн администрациядин кьил Аскер Жабраилова (мугьманар сифте кьабулайдини гьам я) суварин иштиракчийриз, хтанвай вири мугьманриз сагърай лагьана. Рахунар, тебрикар мугьманар патал ачухнавай суфрайрихъни давам хьана.
Хейлин хъсан теклифарни хьана: шаирдин ирс несилри хуьн патал адан тIвар кьуьчхуьрвияр куьч хьанвай цIийи хуьруьз гун; Кьурагьа, Ахцегьа, Дербентда, Огнида, Махачкъалада, масанрани са-са куьчеяр, мектебар, культурадин идараяр шаирдин тIварунихъ ягъун лазим тирди раижна.
ЧIехи шаирдин юбилейдин мярекатар Дербентда, Лезгийрин госмуздрамтеатрдин дараматда искусстводин устадри “Ашукь Саид” тамаша къалуруналди, давамарна.
Ана гьакI Дербент шегьердин ва гзаф районрин администрацийрин, общественностдин, векилри мугьманри иштиракна.
Мердали Жалилов, Нариман Ибрагьимов, Шагьабудин Шабатов
