Седакъет Керимова лезги шииратдал рикI алайбуруз фадлай чизвай, шииратдин къатар деринарзавай, адаз чим гузвай шаир яз таниш я. Ада чIугвазвай еке зегьметди гьихьтин бегьер арадал гъанватIа, лезги чIал, лезги эдебият къунши Азербайжан Республикада гьикI вилик тухванватIа ва и кIвалах гьикI давамарзаватIа чаз аквазва. Седакъет Керимовадин алахъунар себеб яз, Баку шегьерда “Самур” тIвар алай газет акъудзавайди, лезгийрин театр кардик кутунвайди, “Самур” тIвар алай лезги ансамбль ва лезгийрин центр ачухнавайди садазни сир туш…
Мукьвара Седакъет Керимовади лезгийриз къимет авачир савкьат — “Къайи рагъ” тIвар алаз лезги чIалалди чаз кино багъишнава. Зун дикъетдивди сифте кьилелай эхирдал кьван адаз килигна. Кинодин сифте кьиляй жегьилрин арада авай кIанивални вафалувал акурла, зун лугьуз тежер кьван шад хьана. Амма зи, гьакI кинодиз тамашай амайбурунни шадвал яргъалди давам хьанач. Залум дяведи, ахпани диде-бубадиз пул квай къавумар кIан хьуни кьве жегьилдин — Ярметанни Яргунатан — цуьк акъудзавай уьмуьрдин гатфар барбатIзава, цуьквер вири, хару яна, терг хьана.
Кинода кьилин ролда къугъвазвай Яргунатан гьайиф за гзаф чIугуна. Ам вичин гафунилай элячIнач, жегьил тирла, вичиз кIан хьайи гада Ярметаз вафалу яз акъвазна… Уьмуьрдин лап эхирдалди ам хтунихъ умудлувал квадарнач. Шумуд сеферда, шумуд чкадилай илчияр атанайтIани, ам гъуьлуьз фин тавуна акъвазнай.
— Ярмет хкведайди я, Ярмет сагъ тирди заз чизва, — инанмиш тир ам. Амма ада уьмуьрдик кутур умудар кьилиз акъатнач… Тек яз амукьай Яргуната Ярметан вахан гада хвена, чIехи авуна, адав хъсандиз кIелиз вугана, институтдик кутуна.
Амма дишегьли куьн иеси хъхьанатIа, чаз акуна… Вучиз Ярмета Яргунат Туьркиядиз хутахначиртIа, вучиз ада вичиз уьмуьрдин эхирдалди вафалувал хвейи дишегьлидин къайгъу чIугуначтIа, ам вичи хвейи аялдивайни вучиз къакъуднатIа лугьуз гьайиф чIугуна. Сифте кьиляй шад хьайи зун, эхир ахкурла, курпашман хьана. Гьавиляй за лугьузва: шадни хьанай, пашманни.
Сагърай Седакъет вах вун! Кинодиз ганвай тIвар “Къайи рагъ”, дугъриданни, лайихлуди хьанва. Чаз чирвал, ракъини гьамиша чимивал гун лазим я. Амма Ярметан вафалувал чимивал авачирди, гьавиляй рагъни “къайиди” я. Заз эхирдай мадни лугьуз кIанзава: дидейриз кьван — балайриз, вахариз кьван — стхайриз, уьмуьрдин юлдашар яз, папариз кьван — итимриз уьмуьрда кIан тахьун, ибур, белки, тIебиатдин къанунар я жеди…
Шихали Багъиров
