И йикъара Каспийскда, А.Алиеван тIварунихъ галай спортдин дараматда, вири жуьрейрин (всестилевое) каратэдай кьиле фейи Дагъустандин кIвенкIвечивал патал акъажунра ва чемпионатда чи республикадин районрайни шегьеррай тир 300-далай виниз спортсменри иштиракна. Къизгъиндаказ кьиле фейи акъажунра Махачкъаладин команда 1-чкадиз лайихлу хьана.
Шад жедай кар ам я хьи, кIвенкIвечи чкаяр кьур ва чпикай сентябрдиз Анапа шегьерда кьиле фидай уьлкведин чемпионатда ва кIвенкIвечивал патал акъажунра иштиракдай команда арадал гъидай спортсменрин жергеда Дербентдай тир командадик кваз иштиракай чи ватанэгьлиярни авай. ИкI, вичин ери-бине Кьасумхуьрелай тир Осман Гьажимусаеван гъилик чпин устадвал хкажзавай Мегьамед Межидов (72 кг-дал къведалди заланвал авайбурун арада, 14-15 йисарин категорияда) ва Ислам Алиев (39 кг-дал къведалди заланвал авайбурун арада, 12-13 йисарин категорияда) 1-чкайриз лайихлу хьана.
РикIел хкин: Осман Гьажимусаев Дербентда яшамиш жезва, тренервилин кIвалахдал машгъул я. 2019-йисан ноябрдиз ам Италиядин Марина-ди-Каррара шегьерда женгинин единоборствойрай кьиле фейи дуьньядин чемпионатда ММА-дай ва грэпплингдай 70 кг-дин заланвал авайбурун арада къизилдин медалриз лайихлу хьанай.
Рагнеда Рамалданова
