И йикъара Мегьарамдхуьруьн райондин Къартас — Къазмайрал неинки и хуьруьн, гьакI вири районэгьлияр патални еке метлеб авай вакъиа кьиле фена. Ина важиблу объект — алай аямдин вири истемишунрив кьунвай спортдин майдан (чIур) шад гьалара ишлемишиз вахкана. Идакай “Лезги газетдиз”муниципалитетдин администрациядин пресс-къуллугъди хабар гана.
Шад мярекатда Мегьарамдхуьруьн райондин кьил Фарид Агьмедова, администрациядин жавабдар къуллугъчийри, райондин тешкилатрин ва идарайрин кьиле авай ксари, СМИ-рин векилри ва хуьруьнвийри иштиракна. Фарид Агьмедова хуьруьн агьалийриз лишанлу и вакъиа тебрикна.
— Инсанар патал еке метлеб авай ихьтин объектар арадал гъайила, чи райондин кIалубни дегиш жезва. Имни сагъламвал мягькемарунин рекье, гьакIни сугъулвал алудун патални мад са кам къачун я. Чахъ чпин дувулар рикIелай ракъур тийизвай инсанар аваз хьунал ва чпин хайи ерияр вилик тухуник абуру чпин лайихлу пайни кутунал чна шадвалзава. Чна и кардай абуруз сагърай лугьузва, — кIватI хьанвайбурухъ элкъвена лагьана Фарид Агьмедова.
Вичин рахунра ада мадни къейд авурвал, спортдин и жуьредин объектар райондин мад кьве хуьре: Мегьарамдхуьре ва Бут-Къазмайрални ачухнава. Гележегда райондин кьиле авай ксари, авай вири мумкинвилерикай менфят къачуналди, хуьрерин чкайра шартIар хъсанарун давамардайвал я.
— Агьалияр, яшарилай аслу тушиз, физический культурадал ва спортдал машгъул хьун гзаф важиблу я, — алава хъувуна райондин кьили.
Мярекатдал Фарид Агьмедова Къартас-Къазмайрин хуьре спортдин цIийи объект ачухунай меценат, “Дорботсервис” ООО-дин генеральный директор Леонард Нагъиеваз чухсагъул малумарна. Лишанлу вакъиа агьалийриз РД-дин Общественный палатадин член Юнус Балабегова ва Къартас-Къазмайрин агъсакъалрин советдин председатель, гьакIни Дербент райондин Белиж посёлокдин кьил Рамиз Гьабибуллаева, къуватлу структурайрин ветеранри, школадин директорди тебрикна.
Къейд авун лазим я хьи, спортдин майдан алай аямдин вири истемишунар фикирда кьуналди туькIуьрнава. Агьалияр йикъан гьи вахтунда хьайитIани спортдал ва физический культурадал машгъул хьун патал ина вири шартIар тешкилнава.
Эхирдай майдандал Советрин Союздин Игит Абас Исрафилован тIварунихъ галай 1-нумрадин ДЮСШ-дин футболистри ярж яз сад лагьай къугъун кьиле тухвана.
Чи мухбир
