Жабраил Гьажиев 2002-йисуз Ахцегьа дидедиз хьана. 2019-йисуз ада 2-нумрадин АСОШ агалкьунралди куьтягьна. Аял вахтарилай спортдал машгъул жезва. Жабраилан сифте тренер-насигьатчи буба Гьажиражаб тир. 2014-йисалай ада А.Гъаниеван тIварунихъ галай ДЮСШ-да тренер, РФ-дин спортдин мастер Фейруз Садыхован гъилик вердишвилер къачуз эгечIна.
Бакудиз фейи жегьил дагъви, мукьва-кьилидин теклифдалди, ана азаддиз кьуршахар кьунай дуствилин турнирда гьасирдал экъечIна. И вахтунда адан бягьсериз Азербайжандин лайихлу тренер, 2000-йисуз азаддиз кьуршахар кьунай Олимпиададин чемпион хьайи Намик Абдуллаеван насигьатчи Вагьид Мамедова дикъет гузва. Алай йисалай эгечIна и тренердин регьбервилик кваз жегьил пагьливанди еке агалкьунар къазанмишнава.
Кьилди къачуртIа, 2019-йисан февралдиз Жабраилакай Азербайжан Республикадин чемпион хьана. Июлдин вацра ада Бакуда кьиле фейи Европадин жаванрин Олимпиададин гатун XV фестивалда къизилдин медаль къазанмишна. Июлдин эхирра 17 йиса авай пагьливандикай Азербайжандин хкянавай командадик кваз Болгариядин меркез Софияда кьиле фейи акъажунра жаванрин арада дуьньядин чемпион хьана. И акъажунрин финалда 65 килограммдин заланвал авайбурун арада Жабраил Гьажиева Россиядай тир Батырбег Цховребовахъ галаз бягьсина инанмишвилелди гъалибвал къазанмишна. Финалдиз экъечIдалди вилик ада гьакI Микаил Топалан (Туьркия), Амир Гьуьсейн Рза Молагидин (Иран), Рюсуку Керудин (Япония), Давит Пацунашвилидин (Гуржистан) винел гъалибвилер къачуна.
7-августдиз Ахцегьа жегьилрин арада дуьньядин чемпион Жабраил Гьажиражабович Гьажиев къаршиламишуниз талукьарнавай гурлу мярекат кьиле фена. Муниципалитетдин депутатрин собранидин председатель Абдулкерим-Палчаев, райондин кьилин заместитель Роберт Гьамзаев кьилеваз Гъурун кIамун майдандал Ахцегьрин 2-нумрадин школадин, А.Гъаниеван тIварунихъ галай ДЮСШ-дин (инра Ж. Гьажиева чирвилерни вердишвилер къачуна) коллективар, чемпиондин мукьва-кьилияр, дустар ва гзаф масабур кIватI хьанвай.
Азербайжан Республикадин лайихлу тренер Вагьид Мамедовахъ галаз жегьил чемпион хайи чилел багърийри, адет тирвал, кьелни фу, цуькверин кIунчIар гваз, зуьрне-далдамдалди къаршиламишна.
Чна кьегьал лезги хциз и кукIушар мубаракзава. Мукьвал тир девирда Жабраил Гьажиевакай Олмпиададин къугъунрин чемпион хьун чи мурад я!
Дашдемир Шерифалиев
