ЧIехи Гъалибвилин — 79 йис

Кьурагь

Суварин мярекатар Гъалибвилин паркуна кьиле фена. Райондин администра­циядин кьил Замир Азизова агьалийриз Гъалибвилин сувар мубаракна ва лагьана: «Ватандин ЧIехи дяведа райондин гзаф кьегьалри душмандихъ галаз къати женгера иштиракна. Гзафбуруз женгерин майданрай хтун кьисмет хьанач. Чна абур гьамиша рикIел хуьзва. Гъалибвал къазанмишай кьегьалрин хтулри, птулри къе уьлкведин аслу туширвал патал миллетбазрихъ галаз викIегьвилелди женг чIугвазва».

Суварин мярекат райондин культурадин къуллугъчийри концерт  гуналди акьалтIна.

Кьасумхуьр

Гъалибвилин йикъаз талукьарнавай шадвилин митинг «Аскервилиз баркалла» обелискдал цуьквер эцигунилай гатIунна. Райондин муниципалитетдин кьил Саид Темирханова кIватI хьанвайбуруз сувар мубаракна. Ада къейд авурвал, алай аямдин несилди бубайрин крар викIегьвилелди давамарзава. Гьар герек атайла, Ватан хуьдай  кьегьалар майдандиз экъечIун тарифлу кар я. Районэгьлийри женгерин иштиракчийриз екез гьуьрметзава, абур акьалтзавай несилдиз чешне яз къалурзава.

Чкадал гьакI спортдин, культурадин мярекатарни кьиле тухвана. Концертда район­дин культурадихъ, искусстводихъ галаз ала­къалу идарайрин къуллугъчийри иштиракна­.

Мегьарамдхуьр

Суварик иштиракзавай агьалияр райондин администрациядин дараматдилай Ватандин ЧIехи дяведа телеф хьайи  аскерриз эцигнавай памятникдал кьван фена. Райондин кьил Фарид Агьмедова ва иштиракчийри памятникдал цуьквер эцигна.

Митинг жедалди вилик  райондин кьилевайбур ва мугьманар спортдин майданрал фена. Анрал дзюдодай, азаддиз кьуршахар кьунай акъажунар тешкилнавай. Абур дяведин махсус серенжемда телеф хьанвайбурун шикилрин выставкадизни килигна. Ф. Агьмедова, мугьманри, митингдин иштиракчийри СВО-да телеф хьайи  майор, «Жуьрэтлувиляй» ва кьве ордендин сагьиб Руслан Примован санай мвсаниз тухудай музейдални кьил чIугуна.

Суварин иштиракчийри ва мугьманри чуьлдин кухнядин хуьрекарни дадмишна.

Ахцегь

Гъалибвилин йикъаз талукьарнавай мярекатар Советрин Союздин Игит Валентин Эмирован тIварунихъ галай паркунилай га­тIунна. Иштиракчийри памятникдал цуьквер эцигна. «Даим цIай» обелискдин вилик сувариз талукьарнавай шад митинг кьиле фена.

Мярекатда СВО-дин иштиракчийри, райондин идарайрин къуллугъчийри, Ахцегьрин пограничный дестеди, жаван армейцийри, волонтерри, школьникри иштиракна.

«Нацизмдин винел къачур гъалибвилин зурбавал чна къенин юкъузни кьатIузва. ЧIехи Гъалибвал къазанмишуник чи бубайри, ата-бубайри чпин еке пай кутуна. Совет­рин Армиядин, халкьдин гьунарлувал чи уьл­кведин тарихда ва алемда даим амукьда», — лагьана райондин администрациядин кьил Абдул-Керим Палчаева.

Усугъчай

Шадвилин митинг Гъалибвилин цIийи хъувунвай паркуна кьиле фена. Райондин муниципалитетдин кьил Мегьамед Шамилова кIватI хьанвайбуруз сувар тебрикна ва виридахъ сагъламвал, хушбахтлувал, къени крар, дуьньяда ислягьвал хьана кIанзавайдакай лагьана.

— Фашистрихъ галаз кьиле фейи женгера­ 3 агъзурдалай виниз районэгьлийри­ иштиракна. Абурукай 1800 кьегьалди Ватан патал чанар къурбандна, — лагьана М.Ша­ми­ло­ва.

Гуьгъуьнлай райондин ва республикадин искусстводин устадри еке концерт гана.

«Лезги газет»