1-сентябрдиз, вири уьлкведа хьиз, Дагъустандани Чирвилерин йикъаз талукьарнавай шадвилин мярекатар кьиле фена. Чна виликдайни хабар гайивал, цIи Дагъларин уьлкведа цIийи 15 мектебни аялрин 13 бахча ачухна, 139 мектебда цIийикIа туькIуьр хъувунин кIвалахар кьиле тухвана. Образованидин цIийи идараяр республикадин 22 муниципалитетда кардик акатнава. 1-классриз цIи 52 агъзурдав агакьна бицIекар фенва.
Эхиримжи йисара Дагъустанда эцигнавай виридалайни чIехи мектебрикай сад Махачкъала шегьердин «Ипподром» микрорайонда ачухна. Милли «Образование» проектдин сергьятра аваз эцигнавай и мектебда кIелдай 1124 чка ава. Ам ачухуниз талукьарнавай мярекатда интернетдин куьмекдалди (онлайн-къайдада) РФ-дин Президент Владимир Путина ва Дагъустандин Кьил Сергей Меликова иштиракна. ЦIийи мектебдиз Украинада кьиле физвай махсус серенжемда телеф хьайи Каспийскдин флотилиядин къуллугъчи Алексей Суханован тIвар ганва.
Къейд ийин хьи, 1-сентябрдиз Кьиблепатан Дагъустандани цIийи кьве мектеб пайда хьана: Ахцегьани Агъа СтIал- Къазмайрин хуьре. Агъадихъ чна и мектебар ачухуниз талукьарна кьиле тухвай мярекатрикай «Лезги газетдин» хсуси мухбир Дашдемир Шерифалиевани штатдик квачир мухбир Хазран Кьасумова гьазурнавай макъалаяр гузва.
Ахцегь
Девирдин вири истемишунар фикирда кьуна туькIуьрнавай къулай проектдин, алай аямдин технологийрин алатралди тадаракламишнавай, кIелдай 120 чка авай 3-нумрадин юкьван мектеб ахцегьвийриз Чирвилерин суварин кьетIен савкьат хьана.
Мектеб ачухуниз талукьарнавай мярекатда РД-дин Гьукуматдин Председателдин заместитель Рамазан Жафарова, рекъемрин рекьяй вилик финин министр Юрий Гьамзатова, РД-дин хуьруьн майишатдин ва недай суьрсетдин министрдин заместитель Зураб Къучаева ва эцигунрин рекьяй гьа и министерстводин векил Али Шамилова, РД-дин Гьукуматдин Председателдин куьмекчи Мегьамед Юсупова, РД-дин Халкьдин Собранидин депутат Мегьамед Алиханова ва масабуру иштиракна.
Рамазан Жафарова вичин тебрикдин гафуна къейд авурвал, гьар са кас савадлу ва медени авунин ва санлай жемият вилик тухунин карда школадин, образованидин важиблувал кьетIенди я. «Инанмиш я, Ахцегьа ачухнавай цIийи школа аялриз неинки дурумлу чирвилер гудай, гьакIни акьалтзавай несилар чи бубайрин лап хъсан адетар давамардай халис ватанпересар чIехи ийидай макандиз элкъведа. Школа Дагъустан, Россия хушбахт гележегдихъ тухузвай куьлег я. За аялриз дурумлу чирвилерни дуьз тербия къачунин рекье агалкьунар, муаллимриз чпин акьалтIай важиблу карда хъсан ученикарни сабурлувал хьун алхишзава. ЦIийи школа и карда квез куьмек я», – лагьана ада.
Ахцегь райондин кьил Абдул-Керим Палчаева Ахцегьа школа эцигунай РД-дин Кьил Сергей Меликоваз, РД-дин Гьукуматдин Председатель Абдулмуслим Абдулмуслимоваз, хуьруьн майишатдин ва недай суьрсетдин министерстводинни «Дагсельхозстройдин» коллективриз ва райондин виликан регьбер Осман Абдулкеримоваз сагърай лагьана.
ЦIийи школадихъ галаз таниш хьайибуру гьейранвилелди къейд авурвал, ина къулай шартIар тешкилнавай классар (гьар са класс интерактивный доскадалди, акустикадин къурулушдалди, проектордалди, компьютердалди ва кIелунрин рекье герек маса шейэрин тамам комплексдалди таъмин я) ва вижевайдаказ тадаракламишнавай гегьенш спортзал, актовый зал, пищеблок, рушаризни гадайриз кьилди-кьилди устIарханаяр ава. Гьелбетда, ихьтин школади муаллимриз багьерлувилелди кIвалахдай ва аялриз дерин чирвилер къачудай, илимдин кукIушрихъ фидай мумкинвилер гузва.
Агъа СтIал-Къазмаяр
Республикада цIийиз ачухай школайрин арада «Хуьрерин мулкар комплекснидаказ виликди тухун» программадин сергьятра аваз эцигнавай, кIелдай 400 чка авай, Руслан Сейфединович Абасован тIварцIихъ галай пуд мертебадин Агъа СтIал-Къазмайрин школани ава.
Ам ачухунин шадвилин мярекатда РД-дин Гьукуматдин Председателдин заместитель Нариман Абдулмуталибова, СтIал Сулейманан райондин кьил Саид Темирханова, жавабдар маса ксари иштиракна.
Мярекат ачухдайла сифте гаф рахай Саид Темирханова районэгьлийрин тIварунихъай Сергей Меликоваз, Гьукуматдиз сагърай лагьана.
Муниципалитетдин кьили къейд авурвал, абурун дикъет ва куьмек себеб яз, эхиримжи вахтара районда яшайишдинни экономикадин рекьерай еке кIвалахар тухуз алакьнава. И куьмек себеб яз, Агъа СтIал-Къазмайрал алай аямдин вири истемишунриз жаваб гузвай школадин цIийи дарамат кардик акатнава. Госпрограммадин сергьятра аваз, меценат Салман Мегьамедрасулович Бабаеван куьмекдалди эцигнавай школа районда образованидин виридалайни чIехи объект я…
Нариман Абдулмуталибова РД-дин Кьил Сергей Меликован, Гьукуматдин Председатель Абдулмуслим Абдулмуслимован ва вичин патай райондин агьалийриз Чирвилерин югъ, цIийи кIелунин йис башламиш хьун, Агъа СтIал-Къазмайрин школадин цIийи дарамат ишлемишиз вахкун мубаракна.
— Къе чна ачухзавай цIийи школади алай аямдин вири истемишунриз жаваб гузва, кIелунин корпусрилай гъейри, школадихъ кьве спортзал, медицинадин кабинетар, пищеблок, хъсандиз дуьзмишнавай гьаят, гегьенш мулкар гала, — лагьана Нариман Абдулмуталибова. – Школа эцигуник пай кутур меценат Салман Бабаеваз, мергьяматлувилин «Умуд», «Инсан», «Иман» фондариз, школа эцигай пудратчи карханадиз за сагърай лугьузва…
Нариман Абдулмуталибова РД-дин Кьил Сергей Меликован патай школадиз телевизор, анин библиотекадиз Дагъустандин халкьдин шаир Расул Гьамзатован ктабар багъишна. Ада школадин директор Жабраил Аслановав Сергей Меликован къул алай Чухсагъулдин чар ва «Дагъустан Республикадин лайихлу муаллим» тIвар ганвайвилин шагьадатнамани махсус знак вахкана.
Чи мухбир
