РФ-дин Гьукуматди Дагъустандин ва Кеферпатан Осетиядин энергетикадинни ЖКХ-дин карханаяр вилик тухуниз талукь программаяр кьилиз акъудуниз алава пулдин такьатар чара ийида. ТАСС-ди хабар гузвайвал, регионрив федеральный бюджетдай тахминан 250 миллион манат пул агакьда.
Къейд ийин хьи, пулдин такьатар чара авуниз талукь документдал РФ-дин Гьукуматдин Председатель Михаил Мишустина къул чIугунва.
Винидихъ тIварар кьур регионра алай вахтунда коммунальный хиле экономикадин гьалар пайгардик кухтун патал тайин серенжемар кьабулзава. Кьилди къачуртIа, ихтилат ЖКХ-дин эменнидин комплексдин бинедал сад тир оператор арадал гъун, экономикадин жигьетдай бине авай тарифар тайинарун ва масабур.
Санлай къачурла, алай йисуз уьлкведин гьукуматдин резервдин фондунай регионриз энергетикадинни ЖКХ-дин карханаяр вилик тухуниз талукь программаяр кьилиз акъудуниз 930 миллион манат чара ийидайвал я.
«Лезги газет»
