И йикъара Запорожьедин областда кIвалахзавай дагъустанви муаллимрив государстводин шабагьар вахкана. РД-дин Кьилин куьмекчи Мегьамед Гьажимегьамедова ТАСС-диз хабар гайивал, образованидин хилен пешекарар Мелитополь шегьерда тебрикна.
Алай вахтунда Запорожьедин областдин мектебра Дагъустандай 14 муаллимди кIвалахзава. Абурун арада СтIал Сулейманан райондин Курхуьряй тир Абубакар Мирзебалаевни ава. Ада географиядинни ОБЖ-дин тарсар гузва.
Запорожьедин областдиз кIвалахиз атуникай рахадайла, ада 1930-йисара дагъвияр савадлу авун патал чи Ватандин жуьреба-жуьре пипIерай Дагъустандиз атай муаллимар рикIел хкана. Адан фикирдалди, хъсанвилиз хъсанвилелди жаваб хгана кIанда. “Гила куьмекар чна гудай вахтар алукьнава”, — лугьузва муаллимди.
Къейд ийин хьи, чкадин образованидин идарадихъ галаз кутIуннавай икьрардин вахт куьтягь хьайидалай кьулухъ Абубакар Мирзебалаевахъ Дагъустандиз хкведай ниятар ава.
«Лезги газет»
