Кьве югъ вилик “Дагъустан” РИА-да кьиле фейи пресс-конференцияда Дагъустан Республикадин милли сиясатдин ва диндин крарин рекьяй министр Энрик Муслимова ва Дагъустандин муфтиятдин председателдин заместитель Мугьаммад Мангуева иштиракна. СМИ-рин векилриз абуру гьаждал финихъ галаз алакъалу месэлаяр ачухна.
— Куь рикIел аламатIа, тIугъвалдихъ галаз алакъалу яз, 2020-2021-йисара гьаждал фидай мумкинвал хьаначир, — лагьана Э.Муслимова. — Шаз Саудовский Аравиядин пачагьлугъди вири дуьньядай са миллион касдиз гьаждал къведай ихтияр ганай. И кар себеб яз, Россиядиз ганвай квотайрин кьадарни тIимил тир. ЦIи и рекъем артухарнава ва Россия патал 25 агъзур чка тайинарнава. Идакай Дагъустандал 10 агъзур виза гьалтзава. Абурукай са агъзур чи ватанэгьли Сулейман Керимован мергьяматлувилин фондунин куьмекдалди фида ва 200 чкани Украинада кьиле тухузвай военный махсус серенжемда телеф хьайибурун диде-бубаяр, багърияр патал чара ийида.
Инал М. Мангуева баянар гайивал, С.Керимован мергьяматлувилин фондунин куьмекдалди ракъурзавай ксар вири тайинарнава. Абурук республикадин вири районрин ва шегьеррин чпихъ такьатрин жигьетдай артух мумкинвал авачирбур кутунва.
Энрик Селимовича малумарайвал, РД-дин Гьукуматдин Председателдин заместитель Рамазан Жафарован регьбервилик кваз гьаждал финин месэладиз талукь совещание кьиле фена. ЦIуд агъзур кас Саудовский Аравиядиз вахтунда рекье туниз талукь тешкиллувилин вири къайгъуяр авунва. Зияратчийрин сад лагьай рейс 2-июндиз рекье гьатда. Дагъустандин муфтият икьрар хьанвайвал, зияратчияр пак чкайриз тухун, хкун “Умма Тур” компанияди вичин хивез къачунва.
Къейд авун лазим я хьи, Саудовский Аравиядиз финин къиметар хкаж хьанва. Мугьаммад Мангуева гъавурда турвал, къиметар хкаж хьун пачагьлугъдин сиясатдилай, шартIарилай аслу я. Эгер кьве йис вилик гьаждал фенвайбуруз ийизвай къуллугъар 300 доллардай акъваззавайтIа, гила и рекъем 1600 доллардиз барабар я. Махачкъаладай Дубайдиз, Мединадиз, Меккадиз самолетдаваз фин 5500 доллар хьанва. Иник фейи чкайра зияратчийриз ийизвай вири къуллугъарни, тIуьнарни, мугьманханаярни акатзава.
Энрик Селимовича Роспотребсоюздин истемишунарни авайди рикIел хкана. Зияратдал физвайбуру талукь рапар ягъун лазим я. Мад са месэладикай тагькимарна. Бязибур, гьаж башламишдалди, харжар тIимил хьун патал туристрин визайралди Саудовский Аравиядиз физва. Ихьтинбур малум хьайитIа, ана абурал еке жермеяр илитIзавалда. Гьавиляй я чеб, я пак уьлкведин талукь органар алдатмишун герек туш.
Нариман Ибрагьимов
