ПОДПИСКА — 2018
“Лезги газетдин” кьилин редактор Мегьамед Ибрагьимован «Руьгьдин девлетлувал къалурин» макъала за еке дикъетдивди кIелна. Гьар йисуз подпискадин вахт мукьва хьайила, ихьтин эвер гунар жезвайди я. Чун хайи чIалал акъатзавай газет ва я журнал кхьихь лугьудай чкадал атунал зун мягьтел жезва. Вилик вахтара лезги чIалал чапзавай газетар кимерал, чуьлда зегьмет чIугвазвай инсанри ял ядай чкайрал сада кIелдай, амайбуру дикъетдивди яб акалдай. Гъавурда гьат тавурбурун суалриз гуьгъуьнлай жавабарни хгудай.
Къе гьикI я? Телевизор, вилик йисара общественностдин уьмуьрда еке роль къугъвай радиояр мудда амач. Майдандиз компьютерар, мобильный телефонар, планшетар, айпадар… акъатнава. Интернетдикай менфят къачуналди, дуьньядин а кьиле, космосда, гъетерин алемда гьихьтин сирер, вакъиаяр аватIа чириз жезва. Мобильный телефонар гвачир аяларни чи йикъара тек-туьк дуьшуьшра гьалтда. И карди техника вилик фенвайди, инсанрин агьваллувал хкаж хьанвайди тестикьарзава.
Къенин юкъуз пине ягъай партал, шаламар нел ала? Садални! Пине вуч затI, шалам гьихьтинди ятIа чидайбур кьери хьанва. Яшар 80 йисарилай алатнавай жувазни ихьтин цIийивилер, къулайвилер акунал зунни шад я. Анжах са кардин патахъай за гьайиф чIугвазва: Мегьамед Ибрагьимован макъаладай аян жезвайвал, чи девирда гзафбур руьгьдиз кесиб хьанва. 10-15 агъзур манат пул гана, мобильный телефон къачуна, хцин ва я рушан гъиле твадай диде-бубадихъ кIвализ дуьньяда, республикада, Лезгистанда кьиле фенвай, физвай вакъиайрикай, крарикай хабарар гваз хквезвай “Лезги газет” кхьидай 820 манат авачни бес? Чи веледар, акьалтзавай несилар къадирлубур, ватанпересар яз чIехи хьун патал гьар са лезгиди, “Лезги газетдилай” гатIунна, хайи чIалал акъатзавай вири изданияр подписка авун лазим я.
Вучиз ятIани, гзафбуруз чи республикадин, районрин, хуьрерин культурадин ва илимдин уьмуьрда кьиле физвай вакъиайрикай, спортсменри къазанмишзавай агалкьунрикай гьяз къвезмач. ИкI тирди куь субутзава? Чна хайи чIалал акъатзавай изданияр кхьин тавуни. “Лезги газетдиз”, журналриз акъудзавай макъалаяр чи ватанэгьлийрикай тушни бес? Чун чаз гьисаба амачирбур туш кьван. За ва я маса касди, СМИ-дин къуллугьчийри, идарайрин чIехибуру хайи чIалал акъатзавай газетар, журналар кхьихь лугьуз вучиз эвер гузвайди я? Вучиз чун ихьтин йикъал атанва? Лезгидиз хас ватанпересвал, жуьрэтлувал, хайи чIалахъ авай кIанивал гьинава?
За хайи чIалан, чилин къадир авай гьар са ватанэгьлидиз 2018-йис патал “Лезги газет” ва чи чIалал акъатзавай амай изданияр подписка авуниз эвер гузва. Ша, чна чи лезгивал къалурин! Чи багъри “Лезги газетдин” тираж, вилик йисара хьиз, 2018-йисузни республикадин газетрин арада виридалайни чIехиди яз амукьдайдак умуд кутазва.
Сажидин, шаир, Россиядин писателрин, журналистрин союзрин член, РД-дин культурадин лайихлу къуллугъчи, насигьатчи
