Юрист, министр, писатель…
Адан биография фикир желбдайди я. Докъузпара райондин Мискискарин хуьре дидедиз хьайи Сфибуба Сфиева (1924-2010) хуьруьн школадилай кьулухъ Дербентда педучилищеда, ахпа Бакуда КГБ-дин школада, гуьгъуьнлайни ДГУ-дин тарихдин факультетда кIелна. Яргъал йисара ада КГБ-дин органра, ахпа ДАССР-дин юстициядин министр яз кIвалахна. Полковник С. Сфиев, белки, республикадин тарихда хьайи са министр я вичикай халкьдин гегьенш къатари гьевесдивди кIелай ктабрин автордикай хьизни малумарай.
Сфибуба Сфиеван сифте ктабдиз — «Пароль — «Рехи Каспий» повестдиз — 1967-йисуз дуьнья акуна. Республикадин ктабрин издательствода ам чкадин авторар патал чIехиди тир 50 агъзур экземплярдин тиражда аваз чапнай. Повестдин бинеда советрин властдин лап сифте йисара Дагъустанда кьиле фейи тарихдин вакъиаяр гьатнава. Вакъиаяр чеб сад муькуьдан гуьгъуьналлаз гзаф кьадарда давам жезвайбур ва терсбур я. Дагъустанда советрин власть тайин хьун революциядин душманри сакIани кьабулзавач. Дагълара мад къучийрин дестеяр кIватI жезва. Абурухъ уьлкведилай къецепата руьгьламишзавай, куьмек хиве кьазвай къуватар ава. Кеферпатан Кавказда Советрин власть мягькем тахьун патал Англияди ва Туьркияди чалишмишвилер ийизва. И уьлквейрин разведкайри Дагъустандиз, «азад авунин чIехи буржи хиве туна», Тарлан лугьудай са кас ракъурзава. Ада дагълара советрин властдиз акси бунтар къарагъарун, ахпа ам вич ана мусурманрин цIийи государстводин кьиле акъвазун лазим я. Амма абур чпин мурадрихъ агакьзавач, тарихдин гьерекат масад я…
И ктаб авторди вичел яргъал йисара кIвалахай повестрин сагъ циклда эвелимжиди хьана. Адалай кьулухъ «КукIварай кьеркь» (1970), «Кавказдин къеле» (1978), эхирни «Руьгьдиз кесибар» (1982) акъат хъувуна. Вири и повестра Кеферпатан Кавказдин чекистри къецепатан душманрихъ галаз тухузвай залан женгиникай лугьузва. Чпикай суьгьбетзавай вакъиаярни 1920-1945-йисара кьиле физва.
Сфибуба Сфиев анжах са дуьшуьшрикай (приключенияр) кхьенвай ктабрин автор туш. Чун патал 1986-йисуз акъатай адан «Хкахь тавур гъед» ктабдихъни еке метлеб ава. Документрал бинелу яз кхьенвай и повестда ихтилат революционер, Дагъустандин хуьруьн майишатдин сад лагьай нарком Мирзебег Ахундовакай физва.
Р. Абдулов
