(Эвел — 2023-йисан 45-50-нумрайра, 2024-йисан 2-9, 14-15, 19-нумрайра)
ГъвечIи лишан №27
Гьакъикъи шагьидвал чуьнуьхун
…Къияматдин йикъан вилик жедай эхиримжи заманада инсанри сада-садан гьахъар (ихтиярар) «неда» ва а кардикай хабар авайди ам ашкара авуникай кис жеда. А инсанри чпивай жезвайтIани, адакай лугьуникай кисда ва гьакъикъат лугьудач, сифте чкадал абуру, шагьидвал ада авун кьулухъна, чпин хсуси итижар (хийир) эцигда. Им, Пайгъамбардин (къуй Аллагьдин патай салават ва салам хьурай вичиз) винидихъ гъанвай гьадисдани къейднавайвал, Къияматдин йикъан лишанрикай сад я (мана): «Гьакъикъатдани, Къияматдин йикъан вилик…».
Жуьреба-жуьре маса крарихъ галаз санал ада къейдна: «…гьахъ тир шагьидвал чуьнуьхун»1.
ГъвечIи лишан №28
Авамвал гегьенш хьун
Аллагьди Вичин Расулдиз (Аллагьдин салават ва салам хьуй вичиз) чирвилер къачун эмирна ва лагьана (20-сура, 14-аят, мана): «…Ва лагь: «Рабби! Зи чирвилер артухара2». Башламишна Расулди чирвилер къачуз ва инсанриз чирвилер гуз.
Пайгъамбарди (Аллагьдин салават ва салам хьуй вичиз) авамвал айибзавай. Ада лагьана (мана): «Гьакъикъатда, Аллагьдиз гзаф такIан я: гьар векъи тIебиат авай кас, гзаф недай къанихди, базарра кIеви ванцелди гьарайдайди, йифиз мейит хьтинди, юкъуз лам хьтинди, и дуьньядин кар чизвайди, Эхиратдин кардин патахъай авам тирди»3.
Ва хабар гана ада Къияматдин йикъан лишанрикай сад авамвал чукIун, гегьенш хьун тирди. Ада лагьана (мана): «Гьакъикъатда, Къияматдин йикъан вилик чирвал хкаж хъийидай ва авамвал авуддай (къведай) йикъар жеда»4.
И гьадисдин маса риваятда лагьанва (мана): «Гьакъикъатда, Къияматдин йикъан вилик чирвал вахчудай ва авамвал гегьенш жедай йикъар алукьда»5.
Ада гьакIни лагьана (мана): «Къведа инсанриз ахьтин вахтар — абуруз капI вуч ятIа, сив хуьн вуч ятIа, садакьа вуч ятIа чир тежедай» 6.
Ада лагьана (мана): «Къияматдин йикъан вилик (жеда)… ва пайда жеда авамвал».
___________________
1 Гьадис Агьмада гъана ва Шуэйб аль-Арнаута ам хъсанди яз гьисабнава.
2 «Таха» сура, 114-аят.
3 Гьадис Ибн Гьиббана вичин «Сахихда» гъанва ва аль-Гьувейниди «аль-Фатава аль-хадисияда» ам хъсанди я лагьанва.
4 Гьадис аль-Бухарийди ва Муслима гъана.
5 Гьадис Агьмада гъана.
6 Гьадис ат-Табараниди гъана.
(КьатI ама)
Ямин Мегьамедов, диндин алим
